DILI, STLNEWS.co – Suku sira simu ona informasaun husi Ministeriu Administrasaun Estatal katak, data ba eleisaun Xefi Suku sira sei hahu iha loron 28 Outubru 2023.
Lia hirak nee hatoo husi Xefi Suku Komoro, Postu Administrativu Dom Aleixo, Munisipiu Dili, Eurico da Costa de Jesus ba STL iha nia knaar fatin Sede Suku Komoro, Dili, Kinta (10/08/2023).
“Ami simu ona informasaun husi Estatal katak, eleisaun Xefi Suku iha Munisipiu 13 nian sei halao iha 28 Outubru 2023,” nia dehan.
Nia afirma, hela fulan rua eleisaun Xefi Suku halao ona iha munisipiu sira, maibe koalia konaba preparasaun ba asembleia meza too iha aldeia no suku.
Estatal la koalia buat seluk, sira la hatete katak eleisaun sentidu hanesan nee, entaun Xefi Aldeia hili hotu ka lae, tanba ida nee lao ho pakote ba Xefi Suku sira neebe atu kandidata aan.
Nia informa, preparasaun ba eleisaun ida nee STAE hatete, iha munisipiu hotu-hotu sei prepara ninia ema para ba iha meza asembleia sira iha nian teritoriu laran tomak.
Nia esplika, tanba nee konaba preparasaun asembelia meza aldeia too iha suku, ida nee mak eleisaun ida hanesan nee Xefi Suku sira. Kandidatu sira seidauk hatene klaru katak, hira mak kandidatu aan ba Xefi Suku tinan 5 mai.
Iha ketak, Xefi Suku Serelau, Postu Administrativu Lautem, Munisipiu Lautem, Deonicio Soares informa, husi parte Autoridade Lokal Munisipiu Lautem nian seidauk iha informasaun ruma klaru konaba eleisaun suku.
“Ami seidauk iha informasaun neebe fiksu konaba eleisaun suku, maibe ami rona informasaun Munsipiu Lautem parte STAE nian katak, eleisaun nee sei monu iha 28 Outubru tinan nee,” nia katak.
(jen)
