Ema Neebe Tuir Jesus Sei Hetan Lialos

DILI, STLNEWS.co Ema neebe mak tuir Jesus ho intensaun atu hetan fasilidade ruma hodi atinji deit nia interese loron ruma sei husik Jesus, maibe ema neebe tuir tanba domin sei hetan lialos.

Kestaun nee hato’o husi Pe. Richardo Pasang SVD, ba STL liu husi nia refleksaun diaria, Domingo nee  (22/08/2021).

“Ema neebe lao tuir Jesus ho intensaun atu bele hetan fasilidade hodi atinzi ita nia interese privadu, iha tempu determinadu balun sei husik Jesus, wainhira nia sente desapontado (dikecewakan). Maibe, ema neebe lao tuir Jesus tanba hadomi Jesus no hetan lialos neebe insubstituivel (tak tergantikan), nia sei sakerifisiu hodi defende Jesus neebe nia fiar nuudar lialos hun. Saun Pedro konese tiha ona Jesus no nia hetan lialos iha Jesus Kristo,” dehan Padre.

Ba Pedro, Jesus nia liafuan sira mak liafuan rohan laek no dala ruma Jesus nia liafuan sira forte no book ema nia fuan. Dala ruma, liafuan mamar no furak neebe ema rona serteza katak liafuan nee los.

Padre Richardo hatutan, povu Israel sira neebe hetan ona grasa Maromak nian, sente ona Maromak nia domin liu husi libertasaun husi rai Egipto, la hanoin atu husik Maromak no adora ba Maromak seluk.

Iha biban nee nia hatete katak, iha familia laen mak nuudar feto nia ulun, tanba nee mak tenke hadomi kaben nuudar Kristu hadomi kreda.

“Feto sira sei hamtauk sira nia laen, nuudar hamtauk ba Kristu, basa laen mak feto nia ulun, nuudar Kristu mak kreda nia ulun. Kreda mak Kristu nia isin lolon. Laen sira, hadomi imi nia kaben, nuudar Kristu hadomi kreda, hodi saran an ba mate tanba nia, atu halo sira sai kmanek, atu hamos nia hodi bee baptismu no lia foun moris nian, hatudu kreda nia an rasik, kreda ida neebe nabilan boot, kreda ida santa. Tan nee, laen sira hadomi imi nia feen hanesan hadomi an rasik, ” hatete Padre.

Padre Richardo haklaken tan, se bainhira familia sira halo ou realiza duni iha moris familia, sosiedade, signifika la iha razaun atu haree fali ema seluk. La iha razaun atu muda fuan ba fuan ema seluk nian, katak so feen no laen ida mak hadomi malu too rohan, la iha tan seluk ona.

Nunee mos Amu Paroku Santo Antonio Baucau, Pe. Manuel da Silva Ximenes SDB, hatete, harii uma kain liu husi prosesu ida tanba nee mak bainhira moris hamutuk ona hametin domin ho orasaun, katak tau fiar iha Maromak hodi moris tuir nain Maromak nia hanorin sira.

Bainhira harii ona familia tenke haree sira nia an atu hametin no haburas sira nia relasaun domin iha familia laran, katak laen respeita feen no feen mos respeita laen no respeita inan aman husi parte rua hotu.*

Reportajen: Emerenciana Pinto

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

KM Aprova Dekretu Lei Apoiu Nesesidade Baziku Ba Funsionariu Publiku

DILI , STLNEWS.co – Konsellu Ministru (KM) halao sorumutu iha Palasiu Governu aprova ona projetu dekretu-lei, atu kria subsidiu mensal ai-han nian ba funsionariu...

MAE Fo Pose Ba Prezidente Autoridade Munisipiu Dili

DILI, STLNEWS.co – Governu liu husi Ministeriu Administrasaun Estatal (MAE), fo pose ba Prezidente Autoridade Munisipiu Dili foun. Ministru Administrasaun Estatal (MAE) Miguel Pereira de...

Update Covid-19 TL 20 Setembru: Kazu Positivu 25, Rekuperadu 127 & Obitu 1

DILI, STLNEWS.co – Sentru Integradu Jestaun Krize (SIJK) ohin relata kazu positivu iha ema nain 25, rekuperadu 127 no obitu nain 1. "Kazu detetadu foun neebe...
%d bloggers like this: