DILI, STLNEWS.co – Timor Leste hasae bandeira meia haste (setengah tiang) no lutu nasional durante loron tolu, hodi fo omenajen ba eis Prezidente Portugal Jorge Sampaio neebe iha loron Sesta (10/09/2021) fila hikas ona ba Aman Maromak nia kadunan Santu.
Tuir Ministru Prezidensia Konsellu Ministru (MPKM) Fidelis Leite Magalhaes katak, iha reuniaun nee delibera ona atu dekreta lutu nasional ba antigu Prezidente Republika Portugeza Jorge Sampaio nia mate iha teritoriu nasional laran tomak, ba periodu loron tolu, to’o tuku 07.59 loron 16 fulan Setembru.
“Asuntu neebe mak Konsellu Ministru ohin diskute nee mak deklarasaun lutu nasional ba falesimentu eis Prezidente Portugal Jorge Sampaio, nunee Timor Leste sei lutu nasional durante loron tolu,” dehan Ministru Fidelis Leite Magalhaes iha Palasiu Governo, Dili, Segunda nee (13/09/2021).
Nia dehan, durante periodu lutu nasional, bandeira nasional sei hasae to’o klaran deit ka meia haste iha nasaun laran tomak, no iha fatin sira uzu obrigatoria nian inklui misaun diplomatika sira.
Jorge Sampaio, mate iha loron 10 fulan Setembru, ema ida neebe mak relevante tebes hodi defende povu no valor konstitusional Timor nian.
Antes nee iha loron Sesta (10/09/2021) Primeiru Ministru Taur Matan Ruak afirma katak, Jorge Sampaio hanesan Prezidente ida neebe kontribui makaas ba Restaurasaun Independensia Nasional, iha neebe nia mai nuudar konvidadu da onra iha serimonia neebe halao iha loron 20 fulan Maiu tinan 2002.
Xefe Governu mos hatete, eis Prezidente Jorge Sampaio sei lembra iha mundu nuudar figura boot iha kauza no liberdade, no rekonese nuudar belun boot Timor Leste no Timoroan nian.*
Reportajen: Alberto Menezes
Editor: Ekipa STL
