Estaka Iha Naktuka Laos Pontus Final, Fiar Xanana Finaliza Fronteira Terestre

DILI, STLNEWS.co – Estaka 79 monta iha linha fronteira bairru Naktuka-Mota Noel Besi, Aldeia Manan, Suku Beneufe, Postu Administrativu Nitibe, Rejiaun Administrativa Espesial Oecusse Ambeno (RAEOA) laos estaka final ba fronteira terestre Timor-Leste (TL) no Indonezia nian, maibe pontus markasaun fronteira TL, atu proteje povu nia toos, natar, no uma.

Tuir Primeiru Ministru Xanana Gusmão dehan, pontu fronteira ne’ebe uluk Portugal no Olanda tau tinan 1904 no tinan 1914 balun mota lori lakon hotu ona, tanba ne’e Estadu Timor-Leste tau fali pontu ne’e iha Timor-Leste nia fronteira hodi bele hatene baliza fronteira entre TL no Indonezia.

“Pontu ne’ebe tau n’e, atu ita hatene ita nia baliza, tanba pontus sira uluk Portugal no Olanda tau, tinan atus ona, mota lori lakon hotu i toos, natar, no uma sira iha rai ne’e ita nian nafatin,” dehan PM Xanana durante dialogu ho povu Naktuka iha Suku Beneufe, Postu Administrativu Nitibe, RAEOA neebe haktuir iha komunikadu ne’ebe STL asesu, Sesta (02/02/2024).

PM Xanana dehan, pontu ne’e ho objetivu ajuda ekipa Delimitasaun Fronteira Maritima no Terrestre nia servisu atu dada linha ba faze negosiasaun ba finalizasaun Timor-Leste no Indonezia ne’ebe bele identifika husi satellite.

Xefe Governu hatutan, loloos foin lalais vizita ofisial ba Jakarta, Indonezia, hasoru Prezidente Republika Joko Widodo asina ona akordu, maibe tanba mosu polemika kona-ba fronteira ne’e, tanba ne’e adia lai.

“Loloos foin lalais ba Jakarta hasoru Prezidente Republika Indonezia Jokowi atu asina fronteira ne’e, maibe buat ne’ebe imi husu atu tau iha akordu populasaun bele lao tama ba fronteira Indonezia, no sira nia populasaun mos bele tama mai, nune’e atu haree malu, kria dame,” tenik Xanana.

Nune’e husu atu asina fronteira tenke entre estadu rai rua, tanba ne’e bele ba fatuk Sinai halo ritual maibe sira lakohi tau, tanba ne’e PM la asina tanba la tau povu nia hanoin iha akordu.

Iha fatin hanesan, Xefe Ekipa Teknika Negosiasaun Fronteira Terestre ba Segmento Naun Rezolvidu TL-RI, Embaixador Roberto Soares reforsa katak, destaka nee bee monta povu Naktuka nia natar no toos laran, laos markasaun final, maibe pontu ne’e nu’udar sinal atu hatene kona-ba markasaun fronteira Timor-Leste nian.

“Pontus koordenadas ne’ebe tau iha natar laran hanesan pontus atu ajuda oinsa bele dada ba linha final nian, iha ema balu lansa informasaun marku referensia Common Border Datun Reference Frame (CBDRF), ne’ebe iha futuru sei utiliza hodi kesi pontus koordenadas final ba linha delenasaun markasaun, tanba ne’e laos hanesan markasaun permanente, maibe hanesan sinal ita nia linha fronteira”, esplika Embaixador Roberto.

Embaixador Roberto hatutan, ho pontu ne’ebe ekipa monta iha povu nia natar laran depois sukat tiha fronteira, Estadu sei kontinua proteje nafatin populasaun sira ne’ebe hela no halo toos no natar iha baliza fronteira ne’e.

(gui)

LEAVE A REPLY

Please enter your comment!
Please enter your name here