Estende EE 12; PR Halo Reuniaun Ho KE-KSDS

(Foto: Arkivu STL)

DILI, STLNEWS.co – Relasiona ho pedidu husi governu konaba deklarasaun ba Estadu Emerjensia ba loron 30 iha teritoriu nasional tomak, tanba nee Prezidente Republika, Francisco Guterres Lú Olo halo enkontru ho Konsellu Estadu no Konsellu Superior Defeza no Seguransa hodi rona opiniaun antes deside EE ba 12.

Bainhira remata enkontru ho Konsellu Estadu No Konsellu Superior Defeza No Seguransa, Asesor Prinsipal Palasiu Prezidensial Gregorio Sousa ba jornalista sira hatete, ohin Prezidente Republika halo reuniaun ho Konsellu rua, tanba oras nee kazu numeru Covid-19 aumenta.

“Reuniaun rua Konsellu Superior Defeza no Seguransa (KSDS) no Konsellu Estadu (KE) desizaun imi hatene ona, tanba kazu Covid-19 aumenta loron ba loron membru KSDS no KE dehan atu halo renovasaun Estadu Emerjensia,” dehan nia ba jornalista, iha Palasiu Prezidente Nicolau Lobato, Dili, Segunda (29/01/2021).

Nia hatutan, Prezidente Republika, Francisco Guterres Lú Olo sei haruka pedidu ba Parlamentu Nasional hodi halo diskute.

“PR Lú Olo ohin sei haruka mensajen ba PN, koordena ho PN sira Kuarta Feira sei debate nee mak reuniaun Konsellu rua nee,” hatete nia.

Entretantu tuir artigu 85 alinea g, Konstituisaun RDTL, Prezidente Republika konvoka membru sira seluk husi orgaun konsulta hanesan Konsellu Superior Defeza no Seguransa no Konsellu Estadu, atu rona ida-idak ninia hanoin konaba pedidu deklarasaun Estadu Emerjensia husi Governu.

Partisipante neebe mak partisipa iha konsellu rua mak hanesan Prezidente Republika, Francisco Guterres Lú Olo, Primeiru-Ministru no Ministru Interior Taur Matan Ruak, Ministru Defeza Filomeno Paixão, Ministru Justisa Manuel Cárceres, Xefe Estadu Maior Jeneral F-FDTL Tenente Lere Anan Timur, Komisariu PNTL, Faustino da Costa, no Diretor Jeral Servisu Nasional Intelijensia Manuel Serrano.

Halo mos parte iha Konsellu nee, membru sira nomeadu husi Parlamentu Nasional mak hanesan Aderito Hugo da Costa, David Dias Ximenes, Abel Pires da Silva. Membru sira nomeadu husi Prezidente Republika mak José Manuel Fernandes ‘Nakfilak’ no Cristina da Silva.

Membru sira neebe halo parte Konsellu Estadu mak Prezidente Republika Francisco Guterres Lú Olo, Eis-Prezidente Repúblika José Ramos-Horta, Eis-Prezidente Republika no atual Primeiru-Ministru Taur Matan Ruak, Prezidente Parlamentu Nasional Aniceto Longuinhos Guterres Lopes.

Halo parte mos Konsellu nee membru sira nomeadu husi Prezidente Republika mak Óscar Lima, Alcino de Araújo Barris, Maria Dadi Soares Magno, Laura Soares Abrantes no Faustino da Costa.

Husi Parlamentu Nasional mak Eduardo de Deus ‘Dusae’, Aurora Ximenes, José Cornélio Guterres, Árcangelo de Jesus Gouveia Leite. Nunee mos Daniel dos Santos Carmo, nuudar Diretor Executivo FONGTIL no seluk tan.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here