DILI, STLNEWS.co – Kondisaun estrada husi nasional ba munisipiu, maioria aat, husu governu toma atensaun.
Kestaun nee fo sai husi reprezentante povu iha uma fukun Parlamentu Nasional (PN), Deputadu Domingos de Carvalho ba STL Segunda nee (11/04/2022) iha PN.
“Ita haree kondisaun estrada husi nasional ba munisipiu ka postu administrativu sira nee kuaze aat hotu ona, no too agora governu seidauk toma atensaun, tan nee difikulta povu agrikultor sira atu lori produtu neebe sira produs ba faan iha merkadu,” dehan Deputadu Bankada CNRT, Domingos de Carvalho.
Nia afirma liu tan, liga ho eleisaun prezidensial segundu volta besik daudaun ona, ka sura deit ona loron atu ema hotu bele ba ezersa sira nia direitu ba vota, karik governu la fo importansia ba kondisaun estrada maka sei kontinua difikulta urnas no mos ema atu ba tuir eleisaun iha idak – idak nia munisipiu.
Iha fatin hanesan, Deputadu Luis Roberto mos hatutan, problema estrada, bee moos, no eletrisidade, kuaze kada semana deputadu sira foti hela deit iha uma fukun ida nee, maibe too agora seidauk iha solusaun.
“Ita nia povu kontinua halerik, ba estrada, bee moos no eletrisidade, tanba estrada aat, agrikultor sira labele lori produtu neebe sira produs ba faan iha merkadu, eletrisidade la lakan, maka halo povu kontinua sunu lampu iha uma laran, no bee moos la iha, obriga sira tenki sosa beee neebe faan iha kareta tanki hodi konsumu,” dehan nia.
(mad)
