Estudante Husu PR Veta Lei Subsidiu Ba Deputadu

DILI, STLNEWS.co – Estudante no ativista husi Universidade Nasional Timor Lorosae, Fakuldade Ciensia Sociais (FCS), husi Departamentu neen (6), husu Prezidente Republika (PR) atu veta ba projetu lei no alterasaun lei ba subsidiu deputadu nain 65 iha Parlamentu Nasional, tanba laiha benefisiu ba povu.

“Ami husi estudante ativista iha Siencia Sociais, liu-liu Siensia Politika, Politikas Publikas, Administrasaun Publika, Relasaun Internasional, Dezenvolvimentu Komunitaria, Komunikasaun Sosial, inklui Inkluzaun Sosial, lameta tebes ho desizaun Parlamentu Nasional nian konaba subsidiu trata saude US$ 600 no transporte US$1.600 ba deputadu sira,” haktuir portavoz Estudante no Ativista UNTL husi FCS, Fransisco Xavier ba jornalista sira liu husi konferensia imprensa, Kuarta (29/11/2023).

Fransisco Xavier hatete, bazeia ba gia-legalidade liu-liu lei konstituisaun RDTL artigu 67, ne’ebé preve Parlamentu Nasional nudar orgaun soberania daruak no iha papel importante hodi produs lejislasaun, fiskalizasaun no desizaun politika.

Maibe senti tristi, nudar matan no tilun ba povu bainhira rona, deputadu 65 produs lejislasaun liu-liu ba projetu lei Nú.4/VI (1o alterasaun) Nú 5/2004 iha loron 5 fulan Maiu, neebe estabelese estatutu deputadu/a hodi atribui subsidiu ba trata saude nian ho montante US$ 600 no ba transporte US$ 1.600.

“Ami estudante tristi tebes haree deputadu/a sira halo produsaun lejislasaun, somente benefisia ba sira nia aan, sira nia grupu, partidu no la hatudu sira nia kualidade profisionalizmu hanesan reprezentante povu iha uma-fukun Parlamentu Nasional,” nia hateten.

Tanba desizaun ba projetu konaba subsidiu deputadu/a neebe hetan aprovadu husi Parlamentu Nasional, neebe ho votu afavor 50 kontra 1 no abstensaun 6.

Ami estudante univeridade la konkorda no lamentavel tebes ba desizaun refere, tanba ami konsidera nudar injustisa sosial ne’ebé koko kuda no haburas iha nasaun Timor-Leste.

(EST 1)

LEAVE A REPLY

Please enter your comment!
Please enter your name here