Estudante Triste La Komemora Konsulta Popular Loron 30 Fulan Agostu

DILI, STLNEWS.co – Relasiona ho desizaun governu liu husi Konsellu Ministru (KM) estende Konfinamentu Domisiliariu (KD) iha Munisipiu Díli inklui mos munisipiu balun, hodi hapara atividade komemorasaun aniversariu konsulta popular loron 30 fulan Agostu tinan nee, halo estudante balun triste.

Estudante husi Universidade Nasional Timor Lorosae (UNTL) Fakuldade Siensia Sosial Herculano Vicente dehan, nia parte  sente triste tebes, tanba la partisipa no la komemora loron istoriku hanesan tinan baibain.

“Ohin la komemora loron istoriku hanesan baibain, halo hau nuudar estudante sente triste, tanba la partisipa loron espesial neebe determina destinu Timor Leste nian iha tinan 1999 no iha loron 4 fulan Setembru ita hetan rezultadu ukun rasik an,” dehan Herculano ba STL liu husi telefone, Segunda nee (30/08/2021).

Hanesan juventude momentu sira hanesan nee importante tebes ba jerasaun foun sira, para refleta istoria. Tanba jerasaun foun balun seidauk hatene lolos konaba loron istoriku sira hanesan nee.

“Antes ita hetan ukun rasik an ida nee liu husi prosesu lubuk ida, no ema barak fakar raan, luta mak foin hetan ukun rasik an. Fakar mak foin atinje ita nia mehi. Tanba deit pandemia Covid-19 nee ita labele selebra ita nia loron neebe determina ita nia destinu nasaun nian,” tenik nia.

Nia dehan, minimu governu labele halo festeza boot, pelu menus komemora netik loron importante sira hanesan nee, atu nunee bele sai ezemplu diak ba jerasaun foun sira.

Entretantu, veteranu Ernesto Fernandes hatete, loron konsulta popular diak ba povu Timor, tanba loron ida nee importante ba Timoroan. Ba ema sira neebe kontra nee, para bele manan buat ida ke los, sei la kontra malu ladun diak, neebe maluk sira kontra mos obrigadu ba sira tanba hahalok mak lori nasaun ba oin.

“Tuir hau nia observasaun iha Parlamentu Nasional hahalok sira neebe hanesan agora halo, tuir ukun ida nee seidauk los, ba povu atu hakmatek ba ukun an ida nee, ka povu ukun an sira gosta tiha ona, maibe ukun nee hanesan ita kaer politika mak dere, entaun povu la hakmatek ida,” dehan nia.

Atual Deputadu Bankada PD nee dehan, povu nee tenke fo livre ba sira, para sira hatene diak no aat iha neebe sira tuir, maibe sei halo hanesan agora buat hotu ita mete, nee sala boot ba rai ida nee.

“Nuudar veteranus atu fo sai ba povu hanesan, povu ami labele koalia bosok ten, povu neebe kiak iha nasaun, povu haree rasik ho matan, semak halo sala no se mak halo los, ida nee mak imi bele haree, imi labele tuir fali ami, tinan lima – tinan lima ami ba bosok imi. Hanesan koalia iha area rurais ami bele ba, maibe sira neebe distribuisaun ho radio ami la koalia, nee povu akompana rasik. Governu ida neebe mak diak mos apoiu no lao ba, maibe povu nia biban husi ukun an ida nee mak hakmatek,” hakotu nia.*

Reportajen: Blandina Mauno

Editor: Ekipa STL

LEAVE A REPLY

Please enter your comment!
Please enter your name here