ETO Distribui Tan 479 Toneladas, Kombustivel Sufisiente

DILI, STLNEWS.co – Tim lider Pertamina Esperansa Timor Oan (ETO) iha Balide, Jose Mouzino da Costa hatete, kombustivel sufisiente ona ba kliente sira, tanba ETO distribui iha armazen 250 toneladas, no iha planu distribui too 479 toneladas.

“Ita haree mina iha estasaun hotu-hotu sufisiente ona ba ita nia kliente sira neebe iha kareta no motor, no ETO nia armazen liu ona 250 toneladas,” hatete Jose Mouzino da Costa ba STL iha Balide, Dili, Tersa (13/06/2023).

Nia dehan, kombustivel durante semana resin ona taka hotu, no ETO sei konstribui tan mina neebe ho montante boot, tanba nee ohin loron sidade Dili laiha ona engarrafamentu.

“Ami hatene katak, ETO sei planu distribui too 479 toneladas, ita senti diak ona no mina sufisiente ona ba ita nia kliente sira neebe persiza,” nia esplika.

Nia afirma, hodi kalan sena malu iha pertamina hotu-hotu, tanba bainhira mina hatun ba tanki rai okos ne sei hein pelumenus oras 1 mak bele abastese ba kareta.

“Horiseik nee ita husu maluk sira nebe agora daudaun iha Mega Petrolum Fatuhada nia komprensaun, ita boot sira bele hetan hotu gazolina, maibe kliente mos tenki hein oras ida mak foin ense,” nia informa.

Iha fatin hanesan, Kondutor Gilberto Almeida Batista informa, agradese ba ETO tanba distribui ona kombustivel mai Timor Leste, tanba nee agora mina sufisiente ba kliente hotu-hotu neebe persiza.

“Ita nia gazolina sei sufisiente too semana 3 ou 4, no ita agradese tebes ba ETO tanba atende lalais perokupasaun povu nia nesesidade,” nia deklara.

Tuir observasaun STL iha terenu haree katak, estasaun sira neebe agora daudaun faan kombustivel mak hanesan Miramar, Mega Belak, Xalila, Realistik/Arjumar, Realistik Balide, ETO Balide, EAST Gas Bidau, Lafaek, Kuluhun fuel, 68 Fuel Station Hudi Laran, 99 Fuel Station Hudi Laran.

(jen)

LEAVE A REPLY

Please enter your comment!
Please enter your name here