Euclides: Kazu Tara Aan iha Tasi-Tolu, Laiha Indikasaun Krime

Segundu Komandante Polisia Nasional Timor-Leste (PNTL), Munisipiu Dili Superintendente Polisia Euclides Belo. (Foto: STL/Claudios de Jesus)

DILI, STLNEWS.co – Polisia Nasional Timor Leste (PNTL) rekolla ona dadus husi vitima Filomena Fatima, neebe hakotu nia vida ho dalan tara aan. Husi dadus neebe PNTL hetan, hatudu katak kauza husi akontesementu nee mak nesesidade bazika iha dapur laran la iha, nomos depresaun ba situasaun sosial, tanba kaben no oan husi vitima hela ketak husi nia.

Liu husi intrevista, Segundu Komandante Munisipiu Dili, Superintendente Euclides Belo ba STL informa, konaba kronolojia kazu tara aan husi vitima Filomena Fatima iha area Tasi-Tolu, Aldeia 12 de Outobru, iha loron Sesta Feira (02/4/2021), vitima mate tara aan nee laiha indikasaun krime ruma.

“Iha tuku 07:45 dader Komando PNTL Munisipiy Dili, liu husi Eskuadra Dom Aleixo Aimutin, simu informasaun husi komunidade Tasi-Tolu Danau 1, katak, akontese iha feto ida tara aan iha Tasi-Tolu, Aldeia 12 de Outobru. Tuir informasaun neebe mak ami hetan husi polisia sira neebe mak rekolla ona informasaun iha rezidensia vitima nian katak, apoiu lojistika neebe mak nia atu konsume nee menus tebes, i klaru katak nia uma laran nee presiza duni atu hetan nutrisaun liu liu ba parte lojistika nian, tanba nee mak polisia haree katak presiza atu halo lina koordenasaun ho parte relavante atu bele toma atensaun ba ida nee,” hatete nia iha nia knar fatin Komando Caicoli, Sabadu (03/04/2021).

Informasaun neebe PNTL hetan katak, karik matebian mate tanba iha gangguan mental hanesan bipolar, bele dehan iha depresaun ruma neebe maka todan ba nia, hodi nia bele oho aan.

Iha parte seluk mos, polisia nia haree katak situasaun sosial bele akontese, hodi sai kauza ba nia aan, tanba iha informasaun mos katak vitima nia kaben lori mos ho oan ba hotu Ermera, no vitima hela mesak iha nia fatin, tanba nee bele iha presaun psikolojia nian, ho nunee solusaun ikus mai mak foti desizaun badak hodi tara aan no lakon nia vida.

“Nee bele hanesan mos kauza ida neebe mak halo nia hanoin barak hodi akumula mos ho situasaun neebe mak akontese, nia bele estraga nia aan, tanba familia mos labele haruka sasan mai no nia mos labele sai, tanba ita haree ninia uma iha dapur laran ita haree lojistika laiha tebes atu nia bele konsume, no vizinu sira mos fo informasaun katak nia mos ba husu aihan ba vizinu sira. Tanba nee mak vitima nia vizinu dadersan nee ba bolu nia atu mai matabisu hamutuk ho sira,” dehan Euclides.*

Reportajen: Efizenia da Costa/Claudios de Jesus
Editora: Josefa Parada

LEAVE A REPLY

Please enter your comment!
Please enter your name here