Ezekusaun Orsamentu 2021, PNTL Prioridade Vensimentu – Ekipamentus

Komandante Jeral PNTL, Komisario Polisia Faustino da Costa informa, ezekusaun orsamentu 2021 nee PNTL sei ezekuta hodi rezolve salariu PNTL, nomos halo ona proposta balu halo kompras ba ekipamentus no seluk tan. (Foto: STL/Claudios de Jesus)

DILI, STLNEWS.co – Komandante Jeral PNTL, Komisario Polisia Faustino da Costa informa, ezekusaun orsamentu 2021 nee PNTL sei ezekuta hodi rezolve salariu PNTL, nomos halo ona proposta balu halo kompras ba ekipamentus no seluk tan.

Liafuan nee Komandante Jeral do PNTL, Komisario Polisia Faustino da Costa ba jornalista bainhira partisipa iha enkontru konaba Prosedimentu Planu Asaun Polisiamentu Komunitariu ba Parte Munisipiu no Rejional (PAPKM/R), iha salaun Tower Fatuhada, Segunda, (22/02/2021).

Nia hatutan, segundu maka liga ba programa balu sei halo pedidu ba aprovazionamentu sira, nee hanesan kompetensia PNTL nian.

Iha biban nee Faustino mos informa konaba sidadaun nain 17 neebe maka hetan kaptura husi UPF
iha area fronteira, tanba tama illegal. Relasiona ho publikasaun semana kotuk katak, familia 17 neebe maka komete iha kazu tama illegal iha fronteira nee lalos.

“17 pessoas neebe maka kaptura iha momentu neeba laos illegal hotu, maibe ida illegal lolos iha momentu neeba hamutuk nain 6, tanba deit iha kontaminasaun balu ba, depois nia mai hamutuk fali ho nia famila, tanba nee ikus mai ita tenke lori ema nain 17,” nia esplika.

Komandante nee haktuir liutan, iha ema nain ida halo kontamina ho ema nain 5, no ida tan seluk halo kontamina ho ema nain 6. Husi ema nain 11 nee hamutuk ho ema sira neebe maka mai husi sorin (Indonezia).

Dadauk nee sira nain 17 iha hotu kuarentena, no prosesu nee ba kriminaliza depois maka sei aprezenta ba iha Ministeriu Publiku, maibe hein depois de sira sai husi kuarentena hodi kompleta 14 dias.

Nia afirma liutan, kestaun de sidadaun sira sempre tama sai illegal, nee laos problema de seguransa iha fronteira maka ladun metin, maibe tanba kontrolasaun ba iha area fronteira nee rasik involve ona ekipa barak.

“Agora dadauk nee laos Polisia Nasional mesak, tanba ita iha Forsa Defeza, iha mos ekipa Covid, no mos lideransa komunitariu sira, no tanba saida maka illegal mosu nee, tanba ema nee iha intensaun duni hakarak halao atividae negosio, no segundu ita nia sidadaun sira neebe maka oras nee iha rai seluk, ho situasaun sira nee, sira tenke fila mai, tanba nee maka ita sempre halo kapturasaun,” hakotu nia.*

Reportajen: Claudios de Jesus/Est.3/Est.5
Editora: Domingas Gomes

LEAVE A REPLY

Please enter your comment!
Please enter your name here