F-FDTL – Militar America Limpeza Iha Palasiu Prezidente Republika

Haree ba inundasaun neebe mak akontese iha loron hirak liu ba halo Palasiu Prezidente Republika nakonu ho tahu. Tanba nee mak oras nee membru Falintil Forsa Defeza Timor Leste (F-FDTL), hamutuk ho Forsa Militar America hamutuk ho ekipa seluk tun direita halo limpeza iha fatin nee. (Foto: STL/Emerenciana Pinto)

DILI, STLNEWS.co – Haree ba inundasaun neebe mak akontese iha loron hirak liu ba halo Palasiu Prezidente Republika nakonu ho tahu. Tanba nee mak oras nee membru Falintil Forsa Defeza Timor Leste (F-FDTL), hamutuk ho Forsa Militar America hamutuk ho ekipa seluk tun direita halo limpeza iha fatin nee.

Diretor Jeral Prezidenti Republika, Domingos Amaral ba STL iha Palasiu Prezidensial Bairru Pite, Kinta nee hatete, oras nee tahu sira sente diak ona tanba apoiu husi instituisaun oin oin inklui mos F-FDTL no forsa militar rasik.

“Ohin loron nee ami loron tolu ona, ohin hau sente kamaan ona tanba apoiu husi instituisaun husi lubuk ida, primeiru husi protesaun sivil neebe mak fornese bombeirus sira mai supa bee nee IGE, nomos F-FDTL neebe mak ohin Xefe Estadu Maior Jeneral Coliati rasik lori trizentus (300) membru F-FDTL no Forsa Militar America mak mai fo apoiu nomos husi kompana balun neebe mak hau lahatene nia naran, ida mak Oscar Lima mos fo apoiu nomos kompania seluk tan,” hatete Diretor nee.

Nia hatutan, liu husi limpeza iha loron hirak nia laran oras nee sira sente tahu sira nee komesa tun ona, hein tan deit bombeiros mai hodi rega tahu sira nee los ona.

Diretor Jeral nee afirma liutan, husi parte EDTL mos mai verifika ona Panel Central Eletrika nia para haree funsiona ka lae, tanba sira mak hatene eletrisidade funsiona kalae.

Nunee mos Prezidente Republika Francisco Guterres Lú Olo hatutan, oras nee tahu nakonu iha Palasiu Prezidente, tanba nee mak ohin enkontru semanal ho Primeiru Ministru Taur Matan Ruak halao iha Xefe Estadu nia rezidensia deit.*

Reportajen: Emerenciana Pinto
Editora: Domingas Gomes

LEAVE A REPLY

Please enter your comment!
Please enter your name here