DILI – Membru Falintil Forsa Defeza Timor-Leste (F-FDTL) husi kompontente naval neebe maka komete krime iha Munisipiu Oe-Cusse, hodi ataka polisia unidade tranzitu, oras nee husi komandu foti ona sansaun hodi halo demisaun ba membru hirak nee.
Tuir Xefe Estadu Maior Jeneral F-FDTL Maijor Jeneral Lere Anan Timur katak relsiona ho kazu neebe komete husi membru F-FDTL husi komponente naval nain rua, neebe komete krime iha Rejiaun Administrativa Oecusse oras nee husi komandu rasik foti ona mendida hasoru membru nain rua.
Hau foti ona medida regor hasoru membru F-FDTL nain rua neebe maka husi komponente naval neebe komete krime relasiona ho kazu neebe maka akontese iha Oe-Cusse no membru nain rua nee oras nee dadaun hetan ona demisaun husi komandu,” dehan Lere ba jornalista sira hafoin remata enkontru ho Presidente Republika Taur Matan Ruak iha palasiu presidensial Aitarak Laran, Kuarta (26/4/2017).
Nia dehan ba membru nain rua neebe maka komandu F-FDTL fo demisaun maka nian deviza alferis ida no serjentu ida, maibe komandante F-FDTL nee lamensiona membru nain rua neebe maka hetan demisaun.
Lere argumenta liu tan katak ba membru F-FDTL neebe maka komete krime nian konsidera nee la serve sai militar alem ida nee nia rasik lakohi kontribui ba instituisaun, neebe maka nia atu servi. Natalino T.da Costa
