Fakar Osan Boot Ba Jardin, Governu La Fo Inportansia

DILI, STLNEWS.co – Jardin Motael nomos Jardin 5 de Maiu Kolmera agora daudaun halo hela manutensaun, tanba nee sosiedade sivil konsidera governu gasta osan boot ba jardin sira nee, maibe la fo importansia, kria seguransa hodi garante fasilidade iha jardin laran no ikus mai fasilidade iha jardin sai aat hotu.

Tuir Diretor Ezekutivu FONGTIL, Velintin da Costa Pinto hateten, governu bele haruka kompanhia sira ba halo manutensaun ba jardin sira nee, maibe tenki kria mos seguransa, atu nunee ema labele estraga sasan sira neebe mak instala iha jardin laran nee, se lae mak gasta osan deit, maibe la garante nia kualidade.

“Ami husu ba governu liu-liu Ministeriu Turizmu no Komeriu Industria tenki koordena hamutuk ho autoridade Dili, no responsabilidade kontrola nee husi ministeriu ida neebe, karik ba autoridade Munisipiu Dili, mak sira tenki tau matan ba jardin sira nee, ho nunee vizitante sira labele estraga sasan sira neebe mak tau iha jardin laran, se lae mak ita gasta osan barak hodi halo, maibe la kuidadu mak nia aat hotu, tanba estraga husi komunidade sira,” dehan Diretor ezekutivu FONGTIL Valintin da Costa Pinto ba STL Kinta (25/05/2023) iha nia knaar fatin Kaikoli.

Nia afirma, ai funan sira neebe kuda iha jardin nee sosa ho kustu neebe boot mak lori mai kuda, maibe la tau matan, ai sira nee mate hotu, nee tanba falha no ladun suporta imajen iha kapital Dili.

“Ita haree uma sira neebe mak harii iha Kristu Rei hodi fasilita ema paseu semana semana nee aat hotu ona, haris fatin sira nee mos husik avandona tiha, tanba ema laiha atu tau matan, tanba nee governu bele gasta osan boot ba halo manutensaun, maibe la kuidadu ho diak mak osan sira nee sei fakar arbiru deit,” dehan nia.

(mad)

LEAVE A REPLY

Please enter your comment!
Please enter your name here