Familia Desidi Haloot Luis Lobato Iha Leorema

DILI, STLNEWS.co – Familia husi matebian desidi ona sei haloot Matebian Luis Lobato iha semiteriu Leorema, Munisipiu Lekisa.

Eis Visi Ministru Saude, Luis Lobato hakotu iis iha loron Domingu, tuku 02:00 madrugada, iha Klinika Standford Bridge, Bebora, Dili.

Reprezentante familia Rogerio Lobato katak, familia Lobato senti tristi, tanba lakon ona ema lutador ida iha familia Lobato.

“Ba ami nee hanesan soke boot ida, tanba mate nee hanesan naukten neebe ita nunka espera atu akontese iha ita nia uma laran,” dehan reprezentante familia, Rogerio Lobato ba jornalista iha Delta Nova, Domingu nee (18/06/2023).

Nia konta, iha loron Sabadu horiseik (17/06) nia kondisaun diak hela no laiha sinal neebe hatudu nia moras ruma, tanba iha lokraik sira sei joga karta no iha tuku 19:00 kalan mak nia foin komesa senti kolen no iha kalan boot nia senti, tanba nee familia sira desidi lori ba hospital maibe la konsege salva nia vida.

“Too kalan boot nia (matebian) senti la diak, tanba nee nia bolu nia oan mane atu komu nia isin, tanba nia senti la diak, no nia dehan ba nia oan sira katak nia tenki toba taka hirus ba kama, tanba nia hirus matan moras, maibe derepenti nia senti araska nia muta tia, no senti la diak entaun nia husu sira lori nia ba hospital boot, maibe parese la too, tanba nee sira tama deit ba Klinika Stanford Bebora neeba no tama ba laran doutor sira foti liman tia ona, tanba nia iis laiha tiha ona, neebe hau deskonfia katak, nia mate tanba dala ruma moras fuan, ita iha Timor nunka halo cek up ba moras fuan, entaun dala ruma ita dehan diak hela, maibe ita nia laran nee moras hela,” dehan nia.

Aleinde nee, konaba prosesu funebre, familia Lobato desidi ona katak, sei haloot matebian Luis Lobato iha semiteriu Leorema, Lekisa, maibe mate isin sei tau iha nia rezidensa loron balun tan antes lori ba Leorema, Lekisa.

“Konaba prosesu Funebre ami maun alin sira husi Leorema, Lekisa, desidi katak mate isin sei rai iha Delta Nova too matebian nia feen husi Malazia too iha nee, no ba Timor oan sira neebe hakarak mai presta omenajen bele mai too loron neebe ami lori ba haloot iha Leorema neeba, pelumenus kalan ida rua mak ami sei haloot nia iha semiteriu neeba, familia Lobato barak mate haloot iha Leorema,” dehan nia.

Iha biban nee, Rogerio Lobato mos informa katak, Prezidente Republika Jose Ramos Horta mos hakfodak ho Luis Lobato neebe fila hikas ona ba aman Maromak nia kadunan santu.

“Prezidente Republika Jose Ramos Horta, hau informa ba nia iha dader nee, nia mos hakfodak no tristi, tanba Luis Lobato ema neebe potensia boot ba rai ida nee,” dehan nia.

(alb)

LEAVE A REPLY

Please enter your comment!
Please enter your name here