Familia Labele Ba Vizita Dadur Iha Prizaun

DILI, STLNEWS.co – Despaisu husi Ministeriu Justisa husu ba familia, atu labele vizita dadur sira iha prizaun Becora, atu nunee bele prevene Covid-19.

“Situasaun aktual ba prizaun Becora nian antes hetan despaisu husi ministru justisa iha loron 9, maibe antes nee iha loron 8 haree moras nee nia numeru aumenta nee husi parte prizaun hola kedan pozisaun sira hanesan, suspende vizita husi familia ba dadur sira, hanesan mos formasaun ba dadur sira husi madre, no kontaktu ho madre, no relijiaun seluk pendeta, no musulmanu atu atividade vizita suspende hotu,” dehan Diretor Prizaun Bekora, João Domingos ba STL, iha Caicoli, Tersa (16/03/2021).

Nia hatutan, atividade reza iha sira nia sela laran kontinua lao, no guarda kuidadu nafatin sira, no aprezenta dadur sira ba tribunal atu tuir julgamentu, no aprezenta mos sira neebe moras atu halo tratamentu iha klinika Becora.

Nunee, hahu husi loron 8 too mai agora dadur neebe tama foun iha nain rua no hetan liberdade iha nain tolu, no sira neebe tama foun tau ketak depois liu tiha loron balu foin tama ba sela seluk.

Direktor nee esplika, dadur neebe aprezenta ba tribunal 21 pessoas hodi bele tuir julgamentu, no atividade ba tribunal baucau suspende tanba iha dili aplika serka sanitaria, no la iha notifikasaun husi tribunal Oecusse no Suai, no iha tribunal Baucau deit maka hetan notifikasaun maibe labele lori dadur sira ba hodi tuir julgamentu, tanba Dili iha serka sanitaria.

Iha fatin hanesan Diretor Nasional DNSPRS-MJ, Amilicar Soares Seixas dehan, atu prevene virus nee, prizaun suspende atividade balu.

“Orientasaun husi ministru bainhira atu halo reuniaun ho Konsellu Ministru, ami halo prevensaun atu vizita familia ba dadur sira para lai, atu bele prevene moras nee entre familia no internadu ho guarda prisional sira,” dehan nia.

Afirma tan, konaba dadur sira nia han hemu no moras, atende diak nafatin tanba iha orientadu.*

Reportajen: Terezinha de Deus
Editora: Carme Ximenes

LEAVE A REPLY

Please enter your comment!
Please enter your name here