Fasilidade Iha Bombeirus La sufisiente

Diretor Nasional Bombeirus, Claudio da Silva. (Foto: STL/Claudios de Jesus)

DILI, STLNEWS.co – Durante nee membru bombeirus halao servisu ho deit kondisaun neebe iha hodi halao atendimentu ba publiku, tanba fasilidade la sufisiente ba sira.

Diretor Nasional Bombeirus, Claudio da Silva hatete, fasilidade ba bombeirus la sufisiente, ho nunee membru bombeirus sira halao servisu ho deit kondisoens neebe iha, entertantu membru hirak neebe maka halao knaar iha Munisipiu balu, oras nee dadauk hela iha fatin neebe ladun iha kondisoens, tamba la iha dormetoriu.

“Hau hanoin kuandu ita koalia konaba fasilidade nee, konserteza barak maka ita sei presiza, maibe la signifika la too depois ami la halo servisu (atendementu),” hatete nia iha nia knaar fatin, Caikoli, Dili, (19/01/2021).

Diretor afirma, fasilidade neebe maka la sufisiente nee barak tebes, inklui kareta bombeirus no mos fasilidade ba iha membru sira. “Ita hatene katak ita nia nasaun nee foin maka ukun an, dala ruma setor hotu-hotu sai perioridade tebes, tamba nee maka ita hateten katak buat barak maka sei falta, tamba ekipamentus baziku ba iha ami nia kuartel deit mos la iha kondisoens, mesmu ami nia kondisoens minimu tebes mos ami nafatin halao servisu,” dehan nia.

Nia esplika, membru hirak neebe halao knaar iha Munisipiu balu, oras nee dadauk hela iha fatin neebe maka ladun iha kondisoens. Fatin neebe maka la sufisiente nee tamba la iha dormetoriu, nee hanesan problema boot neebe maka membrus de bombeirus hasoru iha Munisipiu.

Nia informatan katak, ba falta de fasilidade nian nee, sira sempre tau nafatin iha planu orsamentu annual, maibe konserteza labele sosa fasilidade hirak nee iha tinan ida nia laran.

Claudio dehan, kona ba total membrus bombeirus atual hamutuk ema 252, kompostu husi feto 25 pesoas, no mane iha 227.

“Prosesu ba rekrutamentu hamutuk ema 60, maibe agora iha hela faze ikus, faze intervista para sira bele sai membru.”

Nia hatutan katak, numeru de membru hirak neebe maka koloka ba iha Munisipiu nian hamutuk iha 32 pesoas, maibee dadauk nee koloka membru ba munisipiu kuaze la too numeru neebe maka tuir targetu iha.

“Iha munisipiu nian kuaze 25 pesoas mai kraik, maibe planu ba iha tinan ida nee maka ba iha munisipiu tolu hanesan Manatutu, Ermera no Liquisa, ami propoin ba 96 pesoas, neebe atu prense iha korpu tolu nee ho total minimu 32 pesoas kada korpu ida” hateten nia.*

Reportajen: Claudios de Jesus
Editora: Carme Ximenes

LEAVE A REPLY

Please enter your comment!
Please enter your name here