Festa Aniversariu Komponente Naval Kansela

DILI, STLNEWS.co – Komandu FALINTIL Forsa Defesa Timor-Leste (F-FDTL), husi komponente Naval Lijeira, kansela festa aniversariu Komponente Forsa Naval nian ba dala XIX, tanba problema surtu COVID-19.

Komandante Komponente Navál Lijeira, Kapitaun de Fragata, João da Silva husu deskulpa no komprendesaun husi bainaka militar, sivil, veteranu, polisia, no konvidadus importante sira neebe simu ona konvite atu labele hirus, tanba festa nee adia hodi koopera ho desizaun Estadu Timor-Leste neebe deklara ona Estadu Emerjensia da-9 hodi bandu atividade festa hodi evita propagasaun surtu COVID-19.

“Atu evita problema moras COVID-19, tanba nee husu konsiderasaun ba parte hotu komprendesaun ba desizaun neebe Komandu FALINTIL F-FDTL nia desizaun hodi kansela serimonia solene ba komorasaun Aniversariu Komponente Navál Lijeira ba dala XIX neebe sei hala’o iha 12 Janeiru 2021,” dehan Kapitaun de Fragata, João ba jornalista, iha Komponente Navál, Hera, Dili.

Iha parte seluk, Komandante João dehan, durante Komandu Komponente Navál kontinua halao ninia misaun servisu, inklui realiza atividade formasaun ba membru sira hodi ba hasae rekursu iha Akademia Militar, Australia, Japaun Estadu Unidus Amerika, Nova Zelandia, Brazil no nasaun seluk tan.

“Ami sei hasoru dezafiu barak intermus finanseira, rekursu maibe ida nee la hamate ami nia esperitu hodi serbi no kapasita nafatin membru sira hodi konsolida forsa sai metin hodi serbi nasaun,” nia hatete.

Komandu Komponente Navál mos prepara ona rekursu hodi hola parte iha servisu Autoridade Marítima Nasionál (AMN) hodi asegura seguransa ba rikusoin hanesan mina, ikan iha fronteira tasi Timor-Leste.

Iha fatin hanesan, Xefe Komisaun Organizadora Aniversariu Komponente Navál Lijeira, Primeiru Tenente, Nicolau Sousa hatoo agradese ba autoridade suku Hera ho povu no juventude no membru polisia inklui patrosinador sira neebe fo fundus no materiál hodi realiza eventu desportu sira.

Komandu Navál deside hapara s atividade sira seluk hanesan, konsertu muzika animasaun, dansa, jogu komunitariu sae bua no dadatali, espozisaun feira no suspende temporaria mós atividade kazamentu militár nian.*

Reportajen: Efizenia da Costa
Editora: Carme Ximenes

LEAVE A REPLY

Please enter your comment!
Please enter your name here