Festa Natal Halakon Nakukun

Padre Richardo Pasang, SVD. (Foto: STL/Emerenciana Pinto)

DILI, STLNEWS.co – Prezensa Jesus Kristu iha festa natal nuudar naroman, hodi halakon nakukun mundu nian husi sala neebe sarani sira halo.

Kestaun nee hatoo husi Padre Richardo Pasang, SVD, liu husi reflesaun Diaria, neebe halao iha loron, Segunda (28/12/2020).

“Nakukun la bele halakon nakukun so deit naroman mak bele halakon nakukun. Wainhira ita konsiente katak ita ema sala nain, ita hahu hakat ba hodi hasoru Naroman. Ita hotu ema sala nain neebe persiza perdaun husi Maromak,” hatete Padre Richardo.

Padre Richardo hatutan, Igreja ohin loron selebra festa Kanak-kanak Jesus selebra moris ba lalehan labarik oan lubun ida neebe liurai aat Herodes haruka oho. Krime boot neebe Herodes hatudu hodi oho labarik sira, tanba nia tauk lakon poder nuudar liurai apresenta ba ema sira katak kbiit nakukun mak domina Herodes ho ninia moris tomak.

“Ida nee hatudu katak ita ema nia poder ou superiodade mundu nian la liu fali poder Maromak nian. Maromak nia kbiit liu buat hotu iha mundu nee. Ita nia poder limitadu liu duke Maromak nian. Nee duni, ita la bele hetan salvasaun so deit ita nia kbiit,” Padre nee esplika.

Nia dehan, sentidu selebrasaun ohin loron atu fo hanoin ba ema hotu fo atensaun no respeita moris iha prosesu tomak, katak hori kedas hahu ba too nia rohan. Konsilio Vaticano II fo hanoin mai ema katak, Maromak mak Nain ba moris, fo fiar ba ema hodi halao knaar atu souri nia, knaar neebe ema tenke halao ho dignu. Tanba nee, moris houri kedas konsepsaun, ema tenke respeita no tau matan no kuidadu teb-tebes aborto no hamate labarik nuudar Krime neebe la hetan perdaun.” (GS 51).*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here