Feto Inklina Aan Iha Agrikultura 85%

Gender and Social Inclusion Specialist TOMAK, Cecilia Da Fonseca. (Photo: STL News/Emerenciana Pinto)

DILI, STLNEWS.co – Feto nia partisipasaun ba iha vida agrikultura oras nee atinje ona 85% no feto barak mos sai vensedor, tanba sira mos hatene katak sira nia papel importante iha vida ekonomia.

Kestaun nee hatoo husi Cecilia Da Fonseca, hanesan mos Gender & Social Inclusion Specialist, husi TOMAK ba STL Iha nia knaar fatin, Segunda (07/09/2020). Toos Ba Moris Diak (TOMAK), iha programa prinsipal ida oinsa mak empodera feto sira atu bele partisipa mos iha vida agrikultura, oras nee feto nia involvimentu atinje ona 85%.

“TOMAK nia peskiza balun neebe mak hatudu katak 75-85% feto mak involve iha vida agrikultura, no 85% feto mak sai hanesan vendedores, tamba nee feto nia papel iha vida ekonomia sai hanesan xave iha vida ekonomia, tanba nee konsidera feto nuudar xave importante iha família uma kain” hatete Cecilia Da Fonseca.

Gender Specialist husi TOMAK hatutan, halao mos programa empoderamentu ba feto maluk sira laos partisipa iha vida ekonomia deit, maibe iha setor hotu-hotu. Nunee feto bele sai parseiru ho mane iha vida ekonomia familiar hodi bele halo mos desizaun iha large nutrisaun familia, nomos rekursu sira seluk familia nia.

Nunee mos TOMAK halo programa prinsipiu ba empoderamentu feto mak atu asegura no suporta feto sira iha posizaun lideransa iha grupu, atu asegura katak feto hetan mudansa no sente fiar aan, no hasae feto sira nia abilidade iha grupu nomos iha komunidade.

Cecilia dehan objetivu seluk mak tanba haree ba realidade iha Timor Leste presiza tebes tau matan ba feto maluk sira iha asaun sosial sira, hanesan motivasaun atu feto Timoroan sira liu-liu iha area rural bele book-an, no hariku sira ho inisiativa neebe bele fo benefísiu ba familia.

“TOMAK nia dadus kona ba involvimentu feto nia, 75-85% feto involve iha vida agrikultura entaun ida nee sai razaun prinsipal hodi hakbiit sira nia abilidade, sira nia asesu ba fasilidades agrikula, oportunidade direitu ba rai nomos sira nia seguransa hodi sira bele livre hodi halao vida agrikultura hodi bele atinje ba hasae produsaun no rendimentu uma kain nia ho saudavel.” dehan nia.

Nia hatutan realmente vida agrikultura iha Timor Leste sei presiza tebes atensaun sériu husi entidade sira hotu. Iha prosesu ida nee, TOMAK hakarak sai parseiru ida neebe diak liu ba governu, liu-liu MAP atu tulun dezenvolvimentu agrikultura iha nasaun joven nee liu-liu iha parte kapasitasaun, no oportunidade. *

Reportajen: Emerenciana Pinto

Editor: Ekipa STL

LEAVE A REPLY

Please enter your comment!
Please enter your name here