Feto Involve Iha Setor Hotu

Diretora Unidade Feto ba Dezenvolvimentu, Bendita de Jesus Amaral. (Foto: Espesial)

DILI, STLNEWS.co – Ohin loron feto involve makaas tebes iha setor oin-oin kompara ho tempu uluk, tanba uluk feto ladun asesu ba iha area hirak nee hotu.

Kestaun nee hatoo husi Diretora Unidade Feto ba Dezenvolvimentu, Bendita de Jesus Amaral ba STL, iha iha Salaun UFD, Kuarta (02/12/2020).

Nia dehan uluk feto nunka hetan oportunidade hodi Xefea ka Diretora iha instituisaun governu nomos sosiedade civil, parte seguransa mos, feto seidauk asumi kargu hanesan komadante.

“Ita haree loron ohin feto 30% liu asumi kargu iha Xefea ka Diretora, komadante nomos feto sai moderadora hodi faselita ou modera kazu ruma, iha familia laran no sosiedade nia laran, feto balun komesa ona foti dezisaun ba nia an nomos iha familia,” dehan Bendita.

Iha tempu uluk tuir nia katak feto pasivu no defisil atu involve iha kualker atividade, maibe agora feto no juventude feto sira ativu involve iha kualkuer atividade ho intensaun kapasita an, atu bele kontribui iha dezenvolvimentu munisipiu ho nasional.

Nia hatutan feto mak agente paz no sai autor dezenvolvimentu, tanba nee tempo too ona feto tenke foti dezisaun ba an rasik. Tanba nee husu ba feto iha Timor laran tomak presiza kapasita an, nunee hatudu ba mane sira katak feto mos bele.

“Loron ohin mundu modernu ona, ita feto mos prezisa kapasita an hodi hatudu ba maluk mane sira katak, ita feto mos bele halao misaun hanesan mos maluk mane sira, uza oportunidade neebe ita hetan ho dia-diak atu bele kontribui fali iha familia, sosiedade no nasaun,” nia esplika.

Nunee mos Staff Programa Acbiit Celestina de Almeida hatutan, feto sira labele baruk nafatin buka informasaun ativu badinas diak liu tan, atu nunee rona no aprende barak halo prevensaun liu liu labele mosu tan violensia neebe makas iha Timor Leste, nunee fo korajen ajuda tulun mos maluk sira seluk neebe ladun hetan informasaun.*

Reportanjen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here