DILI, STLNEWS.co – Feto nia involvimentu importante iha prosesu dezenvolvimentu nasional, tanba lei rasik garante, feto keta tauk kompete ho parseiru mane.
Lia hirak nee hatoo husi Diretora Fundasaun Haburas Moris, Emerenciana Nipo, ba STL liu husi telefone, Tersa nee (19/09/2023).
Nia hatete, lei garante ona katak feto ho mane iha direitu no obrigasaun neebe hanesan, atu bele partisipa iha kualker atividade, tanba nee feto keta tauk, maibe nafatin kapasita aan ho matenek, no kapasidade hodi kompete ho mane sira.
“Los duni lei proteje ita nia direitu, maibe ita mos nafatin esforsu aan ho formasaun sira, nunee bele hasae kapasidade no skiil hodi bele kompete ho mane sira iha kualker atividade no kualker posizaun, tanba lei proteze mos ita nia direitu,” katak nia.
Diretora nee hatutan, sai ativu feto presiza kapasita aan liu husi partisipa iha formasaun sira, hodi hasae konhesimentu, no bainhira iha ona konhesimentu keta tauk atu kompete iha prosesu dezenvolvimentu nasional.
Nunee mos Feto Potensial, Maria da Costa Exposto husu nafatin ba iha feto sira, esforsu aan ho kapasidade neebe mak iha, bele kontribui ba rai ida nee, tanba rai nee ba oin presiza mos involvimentu feto.
Nunee mos Diretora Fundasaun Caucus Feto ba Politika Terezinha Maria N. Cordoso hatete, ohin loron feto barak ultrapasa dezafiu no partisipa makaas ona iha dezenvolvimentu nasional.
“Iha parlamentu numeru feto makaas, ita hotu akompanha katak sira iha neeba sira mos iha kapasidade duni, oinsa mak halo intervensaun iha parlamentu, nunee mos iha governu, nomos Xefi suku sira bainhira simu ona knaar, ida nee progresu neebe mak boot no mudansa nee iha,” katak nia.
Diretora hatutan, sira nafatin koalia no fo formasaun nunee feto sira nafatin lao ba oin, no motiva nafatin feto sira atu bele hakat ba oin iha prosesu konstrusaun estadu nee.
(eme)
