DILI, STLNEWS.co – Diresaun Nasional Florestal prende ai bubur truk isin 4 neebe tula husi Manatutu ho Likisa mai atu faan iha Dili.
“Hodi kalan ita nia ekipa taks force husi diresaun floresta nian ba halo patroliu konsege prende ai bubur kareta truk ida husi Likisa no truk 3 husi Manatutu ka diresaun Hera nian, hafoin sira prende laiha dukumentus provas ruma husi ema neebe tula ai sunu nee mai atu faan, no ema sira nee laos ita foin prende, maibe beibeik ona, no ami mos tun ona ba halo sosializasaun iha sira nia suku no aldeia, maibe sira sei nafatin tesi ai bubur hodi lori mai faan iha kapital Dili, tanba tuir lei bandu ema labele tesi ai, karik tesi tenki iha lisensa ruma husi parte Floresta nian, no atu tula mai Dili faan tenki iha surat lisensa, maibe realidade ai bubur truk 4 neebe ami prende laiha baze legal ruma, ida nee kontra lei,” kestaun nee fo sai husi Xefi Corpu Guarda Floresta, Joao dos Reis ba STL iha nia knaar fatin Colmera, Sesta nee (05/05/2023).
Tuir nia, ema sira neebe tula ai mai nee tama mai Dili kalan boot no sira la koopera hamutuk ekipa taks force, bainhira bolu sira atu para kareta neebe tula ai, no sira halai makaas buka atu lo-loos, maibe ekipa sira duni toman no lori kedas mai iha Diresaun Nasional Guarda Floresta nian, hafoin halo investigasaun ai bubur sira nee laiha karta lisensa ruma, ai sira nee ema tula ilegal, tanba nee prende hela iha no sei prosesa ba oin, karis sira lao tuir prosesu legal ona maka, sira bele selu multa ho montante US$ 6.50 sent, ou bele US$ 25, sira bele tula fali ai nee ba faan ou ba sira nia nesesidade, maibe sira la selu maka parte Floresta sei la autoriza sira atu foti fali ai nee.
Iha fatin hanesan, Domingos Ximenes neebe tula ai bubur husi Manatutu mai Dili hateten, ai neebe nia tula mai nee atu sunu, laos atu faan.
“Hau tula duni ai iha kareta kiik nee mai Dili, tanba hau nia inan moras hela deit, ami osan laiha atu sosa ai ba sunu, tanba nee aproveita ba foho tesi kedas ai iha neeba lori mai dili atu uza ba tein, laos atu faan hodi hetan lukru ruma, karik atu faan mak ami sei lao tuir lei ho orden neebe iha, katak ami bele ba hasai surat iha Floresta mak lori ai nee mai Dili, maibe ami lori mai nee atu sunu,” dehan nia ho tristi.
Tuir observasaun STL nian iha terenu haree katak, ai bubur kareta truk 4 nee butuk hela iha edifisiu Guarda Floresta Dili nian, no kareta neebe tula ai nee trek rua, kareta neebe governu kontrata hodi tula lixu iha Kapital Dili, kareta refere prende hotu hodi hein prosesu.
(mad/dom)
