Fo Nafatin Kapasitasaun Ba Feto

DILI, STLNEWS.co – Durante nee husi parte Institutu Apoiu Dezenvolvimentu Emprezarial (IADE) nian, sempre fo kapasitasaun nafatin ba feto sira, liu-liu iha atividades negosiu.

Marta Maia, hanesan nain ba kompania Mam Unip. Lda, hatete, los duni katak durante nee husi IADE fo kapasitasaun ba feto sira, atu nunee bele melora diak liu tan feto sira iha sira nian atividades negosiu neebe sira halo, tanba nee oinsa feto emprezaria sira nafatin hetan oportunidade hodi partisipa iha formasaun.

“Ita mos agradese ba ita nian instituisaun relevante sira hanesan IADE hamutuk ho sira nian parseiru, hodi bele fo formasaun mai ami feto sira, neebe hamahan aan iha setor privadu, hau hanoin ita presiza aumenta nafatin ita nian koinesementu, tanba durante nee ami sempre hetan oportunidade hodi bele partisipa iha formasaun hirak nee, maibe dadaun nee ita labele halao formasaun tanba hanesan ita boot media sira mos hatene katak, dadaun nee ita sei aplika hela serka sanitaria, no ita labele halibur malu liu ema nain 10,” dehan Marta ba STL iha armajen perissos Fatuhada Dili, Kuarta (14/04/2021).

Nia dehan, hanesan feto emprezaria, husu nafatin ba maluk sira, liu-liu hirak neebe iha area remotas, oinsa mak bele asesu nafatin informasaun, no labele lakon oportunidade, maibe oinsa atu hola parte nafatin ba formasaun hirak nee, atu nunee bele aumenta liu tan koinesementu ba formasaun ida nee.

“Tuir hau nia haree feto sira nian partisipasaun iha emprezaria seidauk maximu, maibe dadaun nee feto barak mos hola parte iha area ida nee, maske seidauk maximu maibe hahu dadaun ona, ita espera katak, ba futuru ita feto nian numeru partisipa iha area ida nee bele hanesan ho mane sira, tanba nee hau husu ba maluk feto sira katak, ita tenke partisipa iha area saida deit depende ba ita ida-idak nian vontade neebe diak,” tenik nia.

Iha parte seluk, Diretor Ezekutivu IADE, Filomeno Marcelino Belo, antes nee hatete, konaba formasaun ba feto emprezaria sira nee kontinua lao nafatin, tanba fo formasaun nee laos deit iha Dili, maibe iha mos munisipiu sira.

“Hau hanoin konaba formasaun ba feto emprezaria sira durante nee lao hela, tanba ita fo formasaun ba ita nian maluk sira tuir modul neebe mak iha, oinsa sira bele hetan formasaun konaba negosiu ninia,” katak nia.*

Reportajen: Jacinta Sequeira
Editor: Ekipa STL

LEAVE A REPLY

Please enter your comment!
Please enter your name here