Foer Intupidu, Estrada Sai Bee Dalan

DILI, STLNEWS.co – Impaktu husi foer nakonu iha baleta kuak, halo estrada publiku iha area Tasi Tolu sai bee dalan, tanba bee halai tuir estrada, hodi halo estrada sai kuak, maske Dili hanesan kapital nasaun,  maibe to’o agora governu seidauk orienta ekipa ida tuun hodi haree problema nee.

Tuir observasaun STL nian iha terenu haree katak, estada publiku iha area Tasi Tolu nian, hetan estragus ka kuak, tanba impaktu husi foer neebe intupidu hela iha baleta kuak, halo bee labele sai tuir nia dalan, maibe sai fali ba iha estrada laran, hodi estraga kondisaun estrada sai kuak hotu.

Tuir motorista Juliao Soares katak, bee halai fali sae mai estrada leten, tanba foer husi Comoro ka Golgota nian nee tuun hotu mai iha nee, tanba nee, bee dalan intupidu hodi halo bee labele halai tuir nia dalan, maibe bee tenke sai hotu mai estrada boot hodi halo estrada publiku nee sai kuak hotu.

“Ita haree drainazen ka bee dalan neebe intupidu nee, laos foin mak akontese, maibe kleur ona, tan nee bainhira udan estrada publiku nee sai fali pisina, banjir ho bee, problema nee akontese tanba bee dalan nakonu ho foer, no to’o agora governu la tau atensaun,” dehan motorista nee ba STL Sesta nee (14/09/2021) iha Tasi Tolu.

Nia afirma liu tan, lolos nee bee dalan la intupidu, maibe uluk negosiante sira faan obralan nee soe fali OB aat mai iha baleta kuak,  tanba nee halo baleta intopidu no bee labele halai tuir nia dalan, maibe estrada sai fali bee dalan,  no estrada kuak hotu ona tanba bee nalihun permanente.*

Reportajen: Madalena Horta

Editor: Ekipa STL

LEAVE A REPLY

Please enter your comment!
Please enter your name here