FOKUPERS Tristi, Deputadu Sira Buka Subsidiu Ba Aan

DILI, STLNEWS.co – Diretora Forum Komunikasaun ba Feto Timor Leste (FOKUPERS), Maria Fatima Pereira Guterres senti tristi, reprezentate povu iha uma fukun Parlamentu Nasional (PN) hakarak hetan subsidiu, maibe la haree ba povu barak neebe sei moris kiak.

Diretora FOKUPERS, Maria Fatima Pereira Guterres hatoo kestaun nee ba jornalista sira, bainhira remata halo brifing ho jornalista sira konaba orsamentu sensivel ba jeneru iha Salaun FOKUPERS, Segunda (11/12/2023).

Diretora dehan, oras nee sei mosu injustisa sosial no povu barak sei moris aat, tanba nee deputadu sira iha Parlamentu Nasional hakarak hetan subsidiu ba aan tenki tetu didiak lai antes foti desizaun ba aan.

“Deputadu sira presiza reflete fila fali, haree didiak ba asuntu sira boot atu asegura katak, povu Timor Leste nia bem start nee aseguraradu duni molok sira hanoin ba sira nia aan ho osan neebe benefisia sira inklui mos ho regalia sira liu liu benefisia ba transporte nomos saude,” katak diretora.

Nia hatete, tuir nia haree oras nee daudaun povu barak mak sei moris kiak, maibe reprezentate povu iha uma fukun Parlamentu Nasional hakarak hetan subsidiu.

Nia hatutan, konaba hahan vitima sira inklui mos ema ho defisiensia orfonatu sira bele asesu subsidiu mak US$ 1.50, ba ema ida loron ida, no sira ida neebe aloka orsamentu nee ba matabisu deit liu ona US$ 5.

Nunee mos Diretor Asosiasaun HAK, Feliciano da Costa Araujo lamenta Parlamentu Nasional aprova projetu lei Nú. 4/VI (1a), ba alterasaun lei Nú. 5/2004 loron 5 Maiu, konaba subsidiu kada deputadu hetan US$ 600 trata ba saude no transporte ho valor US$1.600.

“Ami nia pontu de vista ba aprovasaun projetu lei refere, ami lamentavel tebes-tebes, tanba laiha benefisiu no dezvantajen tebes ba povu no nasaun, tanba husik povu moris ho situasaun mizeravel sira halo fiskalizasaun neebe laiha pratiku simu osan povu ho volume makaas, senti tristi tebes,” dehan Diretor Ezekutivu Assosiasaun HAK.

Feliciano da Costa Araujo hatete, Parlamentu Nasional (PN) halo lei, fiskaliza problema sosial, halo desizaun, tenki halo hodi benefisiu ba povu, dezenvolve povu nia moris, laos tuur deit hodi dehan halo fiskalizasaun ba problema, maibe realidade povu moris mak nafatin nunka iha mudansa.

(eme)

LEAVE A REPLY

Please enter your comment!
Please enter your name here