FONGTIL – Catalpa Internasional Lansa Plataforma Online

Diretor Ezekutivu FONGTIL, Daniel Santos do Carmo. (Foto: STL/Santina Castro)

DILI, STLNEWS.co – Forum ONG Timor Leste (FONGTIL) servisu hamutuk ho Catalpa Internasional, lansa plataforma online ho naran hamutuk Timor Leste hodi bele hafasil servisu membru sosiedade sivil, liuliu hodi bele minimiza problema malnutrisaun iha rai laran.

Liu husi diskursu Diretor Ezekutivu FONGTIL, Daniel Santos do Carmo hatete, atu hatete katak NGO forum halao knaar ida hanesan hakbiit konesementu instituisaun, ida nee parte ida importante atu sensibiliza hotu, oinsa maka atu komprende didiak aplikasaun telemovel no plataforma online neebe dezenu atu ajuda parseiru sira komunika no kolekta dadus no asesu ba informasaun neebe fahe ona.

“Plataforma online nee nia naran Hamutuk Timor Leste nudar instrument save ida neebe bele haforsa lina kordenasaun no kolaborasaun multi-sektoral, entre FONGTIL ho nia autor NGO sira hodi hatan ba situasaun nutrisaun no seguransa aihan nian,” dehan Daniel iha salaun FONGTIL, Caicoli, Dili, Segunda (22/02/2021).

Nia hatutan, plataforma online nee fornese kuadru estatistika ida ba parseiru sira atu hare sira nia atividade neebe alina iha SDJ, no planu asaun konjunta nasional nian ba seguransa aihan no nutrisaun, entaun nee problema ida neebe teknolojia oinsa maka membru sira atu uza teknolojia hodi update ita boot sira nia servisu neebe liga ho nutrisaun.

“Ita hatene katak buat hotu agora nee iha online, tanba nee oinsa maka membru sira bele aproveita didiak online ida nee, ita hotu hatene katak iha ita nia rain nee problema boot konaba nutrisaun, no foin lalais iha relatoriu ida husi Ministeriu Saude katak munisipiu 3, Ermera, Bobonaro, no Oecusse nee mal nutrisaun inseguransa aihan nee boot liu,” dehan nia.

Reportajen: Santina Castro
Editora: Carme Ximenes

LEAVE A REPLY

Please enter your comment!
Please enter your name here