FONGTIL Ezije Governu Halo Lockdown Ba Bobonaro, Covalima, no RAEOA

Diretor Ezekutivu FONGTIL, Daniel Santos do Carmo. (Foto: STL/Santina Castro)

DILI, STLNEWS.co – Sosiedade sivil liu husi Forum ONG Timor -Leste (FONGTIL), halo konferensia imprensa hodi ezije governu, atu halo lockdown ba munisipiu Bobonaro, Covalima no RAEOA.

Diretor Ezekutivu FOGTIL, Daniel Santos do Carmo hatete, hotu-hotu hatene Covid-19 konsideradu ona sai pandemia tanba afeta ka daet ba umanu tomak mundial nian, balun infetadu direta husi virus ida nee, barak mos sofre konsekuensia sosiu ekonomiku, husi kazu ida nee nian Timor-Leste nudar estadu halo ona medida sira prevensaun barak maibe presiza halo liu tan hodi satan no hodi labele iha transmisaun komunitaria.

“Ami sosiedade sivil husu ba governu atu halo lockdown ba munisipiu Bobonaro, Covalima no RAEOA, no governu tenke asegura nafatin disponibilidade ai-han, no material sanitaria ba komunidade iha munisipiu Bobonaro, Covalima no RAEOA, hodi koresponde ba nesesidade baziku hodi laprejudika komunidade durante periodu lockdown,” dehan nia liu husi konferensia imprensa, neebe halao iha FONGTIL, Caicoli, Dili, Kuarta (17/02/2021).

Nia husu ba governu atu asegura nafatin disponibilidade ai-han, no material sanitaria ba komunidade iha munisipiu Bobonaro, Covalima no RAEOA, hodi koresponde ba nesesidade baziku hodi laprejudika komunidade durante periodu lockdown. Husu ba governu atu aplika test masal ba populasaun hotu iha munisipiu Bobonaro, Covalima no RAEOA.

Husu ba governu PN atu halo desizaun ho seriedade hodi hola ona vasina ba sidadaun ho obrigatoriu no fahe informasaun kredibel ba komunidade kona ba importansia husi vasina.

“Ami apela ba lider politiku sira no lider instituisaun hotu no autoridade hotu iha Timor Leste atu hasai deklarasaun ruma ho kuidadu tanba bele fo influensia ba komunidade atu lakolabora governu liu husi medidas sira neebe governu hasai hodi prevene Covid-19 iha Timor Leste,” dehan nia.

Deniel afirma Governu atu haforsa iha lina fronteira liu husi mobiliza involvimentu komunidade Autoridade komunitaria hodi apoiu forsa PNTL no F-FDTL hodi kontrola movimentu ilegal.

Husu ba governu liu husi Ministeriu Interior no Ministeriu Defeza atu fasilita fasilidade teknolojia hanesan drone ba PNTL no F-FDTL atu kolabora movimentu illegal iha fronteira.

Nia akresenta, maski nunee sosiedade sivil apresia ba progresu servisu neebe governu halo hamutuk ho lina frente hanesan mediku pesoal saude PNTL no F-FDTL no midia, tanba liu husi lina kordenasaun neebe diak konsege fo atendementu ba sidadaun sira iha kuarentena iha izolamentu to iha prosesu reintegrasaun no mos apresia ba parseiru dezenvolvimentu sira hotu, neebe fo ona sira nia kontribisaun moral no material ba estadu Timor Leste hodi prevene no kombate surtu Covid-19.

Reportajen: Santina Castro
Editora: Carme Ximenes

LEAVE A REPLY

Please enter your comment!
Please enter your name here