DILI, STLNEWS.co – Forum Organizasaun Naun Govermental (FONGTIL) husu Polisia Nasional Timor Leste (PNTL) liu husi Unidade Polisia Fronteira (UPF), hamutuk Alfandega atu asegura masimu iha area Fronteira, nunee ema labele hatama sasan ilegal mai Timor Leste.
Kestaun nee hatoo husi Diretor Ezekutivu FONGTIL, Valentim da Costa Pinto ba jornalista STL iha nia knaar fatin Kaikoli, Sabadu (29/07/2023).
Nia hatete, PNTL liu husi UPF hamutuk ho Alfandega tenki sobu rede neebe kontinua hatama sasan ilegal iha fronteira.
“Ita tenki asegura konaba ita nia seguransa iha fronteira, ita nia ofisias sira neebe servisu tenki kontribui ba servisu hanesan Timor oan, tanba ami hatene katak sasan sira nee la monu husi lalehan mai deit, nee tama husi odamatan ida, se nee iha duni rede ida halo ida nee, neebe sira iha kbiit tenki halo penetrasaun, tenki sobu rede ne’e tanba sa ida nee kontinua,” dehan diretur ezekutivu nee.
Nia hatutan, tanba aktu ilegal sira la kontribui ba reseitas, no nafatin fo defisiensia ba seguransa sira iha fronteira, hanoin governu tenki haree ida nee hanesan asuntu ida seriu para tenki halo.
“Husu ita nia polÃsia, alfandega ho ofisiais sira neebe iha autoridade halo investigasaun bele haree didiak para ita bele kontrola diak fronteira, para ita bele asegura seguransa iha ita nia fronteira bele la’o ho diak, ema hotu-hotu bele halo movimentu diak, iha duni aktu merkadu karik ita nia ofisiáis sira tenki kontrola,” haktuir nia.
Nia husu atu haforsa iha fronteira para fasil kontrola, hanoin nee opsaun ida bele halo semana ida bele akontese dala ida ka dala rua para buat hotu-hotu bele kontrola ho diak no evita ona aktu ilegal sira.
“Iha tempu barak ona ami koalia konaba oinsa mak haforsa ita nia jestaun fronteira, ladun justu se ita mai fo sala faan nain kiik sira neebe iha merkadu Taibesi neebe faan siragru, tanba hau hatene sira laiha kbiit asesu sasan ho kuantidade boot ker dizer sasan sira nee mai husi odamatan fronteira,” afirma Valentim.
Nunee mos Diretora Fundasaun Haburas Moris, Emerenciana Nipo hatete oras nee iha ona seguransa iha Fronteira maibe presiza halo patrolamentu rutina nunee bele asegura fronteira ema labele lao ilegal inklui mos lori sasan iha ilegal tama Mai Timor.
Nia dehan, foin lalais negosiante sira lamenta tanba Aifaesa ou parte seguransa ba halo fali apreensaun ba negosiante sira nia sasan katak nee ilegal lolos ba foti iha Fronteira Laos iha merkadu.
“Importante asegura seguransa masimu iha Fronteira, tanba sasan tama sai husi Fronteira,” katak nia.
Nia dehan, governu limitasaunbba rekursu humanus hodi tau matan ba fronteira neebe kue luan, boot maibe governu tau atensaun ida neee.
Nunee mos Prezidente Republika Jose Ramos Horta mos hatete seguransa sira diak liu asegura sasan ilegal iha Fronteira Laos iha merkadu sira.
“Diak liu ba prende sasan iha Fronteira tanba sasan nee tama husi Fronteira mak mai rai laran laos iha Taibesi,” katak Horta.
(eme)
