DILI, STLNEWS.co – Relasiona ho video neebe hatudu iha media sosial, joven Timor oan sira hemu lanu oho malu, Forum ONG Tmor-Leste (FONGTIL) hatoo sentimentu tristi no lamentasaun ba aktus krimi neebe Timor oan sira halo iha United Kingdom (UK).
Lia hirak nee hatoo husi Diretor Ezekutivu FONGTIL, Valentin da Costa Pinto, ba STL iha nia knaar fatin Kaikoli, Dili, Tersa nee (26/07/2022).
“Ita tristi, tanba sira nia viajen husi Timor ba UK ho intensaun boot atu buka servisu hodi hadia sira nia vida no familia sira nian,” dehan nia.
Nia hatete, se problema nee husi Grupu Arte Marsiais (GAM), signifika sira kontinua la obedese ba espiritu ka regras neebe mak governu tau ona.
Iha fatin hanesan, Akademiku Universidade Dili, (UNDIL), Hugo Lorenco da Costa haktuir, problema neebe akontese laos arte marsial mak sala, arte marsiais nunka organiza krimi, maibe pesoal mak utiliza arte marsiais hodi halo krimi.
“Sira neebe envolve iha krimi nee pesoal, ema see mak halo krimi tenki ba hatan tuir lei, tamba nee iha mos responsabilidade organizasaun hotu atu kontrola nia membru sira fo sansaun internal organizasaun ba membru kriminozu sira,” dehan nia.
Nunee husu ba governu tenki seriu haree problema arte marsiais neebe mosu beibeik, maski iha promesa no juramentu entre organizasaun, maibe tenki aplika lei ba sira, laos aplika ba organizasaun, tanba pesoal mak halo krimi.
(san)
