Formadu 10 Remata Treinamentu

Sekretariu Estadu Formasaun Professional no Empregu (SEFOPE), halao serimonia entrega formadu nain 10 neebe remata tuir formasaun Hospitalidade no Turizmu iha, Bali (Indonezia). (Foto: STL/Santina Castro)

DILI, STLNEWS.co – Sekretariu Estadu Formasaun Professional no Empregu (SEFOPE), halao serimonia entrega formadu nain 10 neebe remata tuir formasaun Hospitalidade no Turizmu iha Bali, Indonezia.

Sekretariu Estadu Formasaun Professional no Empregu, Alarico do Rosario, fo parabens ba formadu nain 10 neebe lori Timor nia naran, hodi ba tuir formasaun iha Bali, Indonezia.

“Formasaun nee hanesan referensia ida atu bele mai implementa iha Timor, maneira oinsa atu halo atendementu diak ba kliente,” dehan nia ba jornalista sira, iha Salaun SEFOPE, Caicoli, Dili, Tersa (22/09/2020).

Nia esplika formadu nain 10 nee preparadu ona atu bele servisu, tanba esperiensia neebe sira hetan tenke aplika iha fatin neebe servisu ba, atu nunee hanesan modelu ka matadalan ida ba jerasaun foun sira bele banate tuir.

Liu-liu oinsa atu halo tuir komportamentu entre iha Timor no iha ema nia nasaun seluk, tanba nee liu husi treinamentu kursu nee bele implementa fali iha rai laran.

“Nee hanesan dalan ida atu muda ema nia karakter servisu nian no oinsa atu atende publiku nee oinsa, tanba nee husu ba formadu sira tenki lao tuir esperiensia neebe maka hetan ona, atu aplika iha Timor,” nia esplika.

Governante nee hatete, formadu nain 10 nee antes nee tuir formasaun husi rai laran, hanesan iha Tibar, Senai Becora, Dom Bosco no ETDA.*

Jornalista: Santina Castro
Editora: Carme Ximenes

LEAVE A REPLY

Please enter your comment!
Please enter your name here