DILI, STLNEWS.co – Formasaun ba feto importante, oinsa mak hasae feto nia kapasidade, hodi bele kompete ho mane iha Kualker atividade.
Feto potensial Emerenciana Nipo ba STL telefone Sabadu nee (30/09/2023) hatete, formasaun nee importante tebes.
“Maski lei nee garante feto nia direitu, maibe feto mos tenki kapasita aan, oras nee feto barak mos remata ona estudu iha nivel akademika, maibe formasaun nee importante, nunee bele hasae konhesimentu,” katak nia.
Nia mos husu feto nafatin kapasita aan, hodi hasae feto nia kapasidade hodi bele kompete ho mane sira iha prosesu Dezenvolvimentu Nasional.
Nunee mos tuir Eis Sekretariu Estadu Igualdade no inkluzaun SEII Maria Fatima Coreia hatutan Formasaun sira neebe mak realiza husi SEI hamutuk ho sosiedade sivil nee importante oinsa mak hasae feto sira nia kapasidade hodi bele kompete iha atividade hotu.
“Formasaun sira neebe mak husi SEI rasik, hamutuk ho sosiedade sivil atu fo formasaun ba iha juventude sira liu liu feto juventude atu bele partisipa sira nia aan iha vida politika no bele foti desizaun,” katak nia.
Nia hatutan, espera katak ho esperensia neebe mak iha feto sira neebe mak durante nee iha kapasidade bele kompete mos ba iha Xefi Suku.
“Laos ba sira hili deit ema, maibe sira mos prepara sira nia aan atu ema hili sira, ita mos fo espasu ba maluk ho defisiensia sira,” katak nia.
(eme)
