Fornese Aihan La Saudavel; CAC Tenke Investiga Ekipa Membru Governu

Ofisial Programe AJAR, Inocencio de J.Xavier. (Foto: STL/Jacinta Sequeira)

DILI, STLNEWS.co – Comisaun Anti Corupsaun (CAC), tenke halo investigasaun ba ekipa membru governu nain hira, neebe tama iha programa sesta bazika, tanba fornese aihan la saudavel ba povu.

Ofisial Programe AJAR, Inocencio de J.Xavier hatete, primeiru hakarak apresia ba intervensaun husi CAC neebe mak halo kedas prevensaun, hodi hapara prosesu nee.

Nia dehan, hanesan sosiadade sivil kondena makas ba aktu kompania, liu-liu Dili Mart nian asaun nee, tanba la fo valor no dignifika povu sira, tanba fo fali hahan neebe mak tuir lolos apoiu sesta baziku kualidade saude nian, agora hahan neebe mak horiseik haree hanesan beneno ba ema ida nian ba benifisiariu neebe mak hetan apoiu sesta baziku nee.

“Ami husi parte AJAR nian preokupa ho kualidade apoiu sesta bazika, primeiru governu laiha espriensia teknika, hodi oinsa mak bele identifika prioridade no aihan saida mak merese atu apoiu no sasan saida mak atu bele apoiu ba iha sesta baziku,” dehan Inocencio ba STL, iha nia knar fatin, Farol, Dili, Kinta (10/12/2020).

Nia hatutan laos fo produtu neebe fohuk no dodok kontinua fo nafatin ba povu sira, atu rekopera ekonomia nee, presiza rekopera mos ba ema nian saude, tanba ema nian nutrisaun nee la diak, sei ataka ba Covid-19, entaun ho apoiu ida nee, aspetu ekonomika no apoiu ekonomika, agora iha situasaun ida nee la akontese hotu kedas, rekopera ekonomia nee, rekopera kompania sira ou loja nain sira mak hetan diak, tanba modo no koto sira neebe fo la tuir standar neebe mak iha.

“Folin sasan inventa, hau la hatene durante nee kada familia sira simu ka lae, ou simu deit pakote ida,tanba nee, ami hanoin, governu no kompania viola konstituisaun ita koalia konaba direitu de konsumedores,produtu hotu tenke garante ba ema nian isin diak,agora iha situasaun ida nee, ita viola ona konstituisaun, governu ida nee, liu-liu MCAE, oinsa mak hadia mekanismu bele ajuda, atu nunee labele hamosu polemika iha povu nian let,” dehan nia.

Nia sublina sekarik aktu nee mak sei kontinua, diak liu hapara programa ida nee, liu-liu husu Primeiru Ministru, atu hapara programa ida nee, programa sesta baziku ida nee, ninia benifisiu ba povu nee laiha, tanba benifisiu nee ba deit ukun nain sira, liu-liu ukun nain no kompania neebe implementa programa ida nee, maibe ba povu la hetan buat ida, maibe povu hetan deit sasan neebe laiha kualidade, nee labele maibe oinsa atu trata povu ho dignidade, laos kaer ukun, halo buat neebe tuir sira nian hakarak deit.*

Reportajen: Jacinta Sequeira/Madalena Horta
Editora: Carme Ximenes

LEAVE A REPLY

Please enter your comment!
Please enter your name here