DILI, STLNEWS.co – Bainhira iha moris ho problema fuan la hakmatek ho tristi, diak liu koalia ho Maromak, tanba Nai mak fiel rona ema bainhira koalia ho nia.
Lia hirak nee hatoo husi Padre Richardo Pasang, SVD ba STL liu husi telefone, Domingu (09/07/2023).
Nia hatete, Profeta Zacarias apresenta katak liurai neebe mai mak liurai neebe kbiit nain, haraik aan, sae kuda ksalak, kuda burro nia oan. Nia mak Jesus Kristu, Ema nia Salvador neebe sei mai iha mundu.
Tan nee profeta Zacarias koalia nunee Siaun nia oan feto, haksolok ba Jerusalem nia oan feto, hananu haksolok ba Liafuan hirak nee realiza duni iha Jesus Kristu nia prezensa hodi dehan “Simu Hau nia ukun ba hodi banati tuir Hau, tan Hau laran kmaus no haraik aan no imi sei hetan hakmatek ba imi nia klamar.” liafuan hirak nee atu hatudu katak Jesus nia fuan sempre nakloke no hein wainhira ema saudades be moris neebe refrescante ema nia klamar.
“Wainhira ita nia fuan la hakmatek, ita presiza atu ema ida atu fahe ou koalia sai. Ema ida neebe diak liu no ita fiar atu fahe ita nia esperensia moris mak Jesus Kristu rasik. Jesus Kristu mak rona Nain neebe fiel wainhira ita hakarak koalia iha Nia futar oin. Ho Ninia fidelidade, Nia sei guia ita hodi hetan fali dalan atu bele sai husi ita nia problema moris nee,” dehan Padre.
Padre hatete Jesus mak rezolve Nain ba problema sira hotu neebe ema hasoru. Tan nee keta duvida atu lao ba Nia hodi lori problema sira hotu ho orasaun iha hakmatek nia laran.
“Orasaun neebe ita hatoo ba Nia iha hakmatek nia laran, Nia sei rona ita. Husi esperensia hamutuk ho Nia, espera katak ita mos sai rona nain diak ida ba maluk sira seluk neebe hatoo sira nia problema moris. Espera katak ita bele fiel atu rona, no fiel tulun maluk sira neebe hetan hela difikuldade moris tanba ita mos moris iha Espiritu Maromak nian,” katak Nia.
Saun Paulo iha Segunda leitura afirma hodi dehan Maromak nia Espiritu Santu horik karik iha imi, laos sasan rai nee nian mak ukun imi, maibe Espiritu mak ukun imi. Jesus Kristu neebe moris hias Ninia Espiritu mak moris iha imi. Tan nee, ema mos tenke moris tuir Espiritu nia hakarak. Sekuando ema moris iha Maromak nia hakarak Espiritu nia hakarak Ema sei hamutuk ho Jesus Kristu dehan
“Hau hahi Ita, Hau Aman Lalehan no rai nia Nain, tan Ita subar lialos hirak nee ba ema matenek no boot sira, maibe Ita haklaken ba ema kiik sira. Nee duni, Hau Aman, tuir Ita nia hakaran. Mai ita hotu hatoo ita nia problema sira hotu iha ita nia orasaun sira atu ita bele sai rona nain diak no fiel ba maluk sira nebe moris haleu ho ita. Orasaun Nai Maromak, tan Ita Oan haraik-an, Ita hafoun fali mundo maksalak, haraik ksolok diak ba Ita atan sarani sira, tulun sira tuir dalam Maksoin neebe hasai sira husi salan nia okos. Ami harohan nee hodi Nai Jesus Kristu nia naran hamutuk iha Espiritu Santu. Amin.”
Evanjelho loron Domingo 09/07/2023 DOMINGO XIV Tempu komum ZAC 9 : 9 – 10
ROM 8 : 9. 11 – 13 MAT 11 : 25 – 30 Nai Jesus Kristu nia Evangelho tuir Saun Mateus Iha temu neeba, Jesus lia tun nunee : “Hau hahi Ita, Hau Aman, Lalehan no rai nia Nain, tan Ita subar lialos hirak nee ba ema matenek no boot sira, maibe Ita haklaken ba ema kiik sira. Nunee duni, Hau Aman, tuir Ita nia hakaran. Buat hotu neebe Hau simu mai husi Hau Aman. Ema ida la hatene Oan Mane, Aman deit mak hatene. Ema ida la hatene Aman, Oan deit mak hatene no ida neebe Oan Mane hakarak fo hatene. Mai hamutuk ho Hau imi tomak neebe kole no moris susar, tan Hau sei hakman imi nia kole. Imi, tan Hau nia todan iha imi nia kabaas hodi halo tuir Hau, tan Hau laran maus, Hau haraik-An. Imi sei hetan ksolok ba imi nia klamar, tan Hau nia todan mamar, Hau nia naha kmaan.” Lia Maksoin.
(eme)
