Fulan Rozariu; Hadook Ita Husi Corona Virus

Vice Orasaun Bairo Jesus Divina Miserecordia, BTN 3, Aldeia Terra Santa, Suku Madohi, Carolina Soares de Deus. (Foto: STL/Domingas Soares)

DILI, STLNEWS.co – Fulan Outubru hanesan fulan rozariu ba sarani Katoliku iha mundu tomak, inklui mos Timor Leste. Hanesan ema neebe fiar nain no sarani Katoliku tenke reza no harohan ba nain feto, atu nunee bele hadook ita no nasaun doben nee husi moras Covid-19.

Iha fulan Maiu liu ba, sarani sira la reza tersu tama sai uma, tanba moras Covid-19. Neebe momentu neeba estadu, governu no igreja deklara estadu emergensia, tanba nee hanesan ema fiar nain halo orasaun reza tersu iha ida idak nia uma. Maibe iha fulan ida nee, sarani sira halao fali atividade orasaun reza tersu tama sai uma hanesan tempu normal.

Vice Orasaun Bairo Jesus Divina Miserecordia, BTN 3, Aldeia Terra Santa, Suku Madohi, Carolina Soares de Deus hatete, fulan Maiu nee la halao atividade orasaun reza tersu, tanba moras Covid-19. Estadu, governu ho igreja fo sai estadu emergensia, atu ema hotu hakmatek iha ida idak nia fatin. Maibe hanesan ema fiar nain hasae deit orasaun iha uma. Iha fulan Outubru halao hikas fali atividade orasaun reza tersu, tanba atividade lao normal hikas fali ona, no kumpri mos mensajem husi Amu Papa nian ba mundu katak, sarani tenke reza tersu durante fulan rua nia laran, hahu fulan nee too Novembru.

“Tanba nee mak bairu nee mos halao fali programa orasaun reza tersu nian, tuir ordem neebe fo sai husi Amu Papa ba sarani sira iha mundu tomak. Orasaun reza tersu nee sei halao durante fulan rua nia laran, fulan nee too Outobru. Iha bairu nee familia barak, tanba nee durante fulan rua sei tama hotu. Antes Covid-19 mosu, loron ida uma kain lima reza hamutuk,” dehan nia bainhira dada lia ho STL iha nia hela fatin bairu BTN 3, Terra Santa, Sabadu (03/10/2020).

Adelina afirma, iha atividade reza tersu nee,ema la uza ona maskra no laiha distansia sosial ba malu, tanba atividade iha rai laran lao normal ona. Estadu emerjensia neebe kontinua lao, haree liu deit ba iha area fronteira nian.

Nia hatutan, iha orasaun sempre harohan no reza, atu nunee bele antisipa hanesan fiar nain no Katolika tenke reza, para bele antisipa buat aat hotu.

“Moras neebe mak ita hasoru hanesan Covid-19, maromak sei hatudu dalan no milagre sei mosu. Sekarik moras nee mai, neemos ita tenke simu, nee hanesan kastigu ida ba ita,” dehan nia.

Nia tenik liutan, oras ba atividade reza tersu iha bairu nee hahu tuku 7 no remata iha tuku 8. Ema neebe hola parte iha reza nee maioria labarik feto no mane, joven feto no inan sira. Ida nee mak situasaun neebe agora lao iha bairu nee.

Iha parte seluk Amu Parokio Maria Auxiliadora, Pe. João Roque husu ba sarani sira atu reza tersu iha fulan nain feto nian. Husu ba nain feto atu haraik tulun no proteje povu ho nasaun nee husi moras Covid- 9 no buat aat hotu.

Reportajen: Domingas Gomes
Editor: Ekipa STL

LEAVE A REPLY

Please enter your comment!
Please enter your name here