DILI, STLNEWS.co – Ministru Prezidensia Konsellu Ministru (MPKM) Fidelis Leite Magalhaes hatete, sidadaun sira neebe hakarak halo movimentu livre iha teritoriu nasional tenke kompleta vasina dala rua (2).
“Viajen ba munisipiu no ba transporte pubiku laiha impozisaun espesial ida, maibe ba pasajeiru sira nee tenke sujeita ba regras neebe mak tenke vasina dala rua (2), neebe ema hotu neebe hakarak desloka sai husi nia munisipiu neebe impoin hela Serka Sanitaria (SS), entaun tenke kompleta vasina dala rua (2),” dehan Ministru Fidelis hafoin remata reuniaun Konsellu Ministru iha edifisiu Ministeriu Finansas, Aitarak- Laran, Dili, Kuarta (08/09/2021).
Parte seluk liu husi Monitorizasaun Forum ONG Timor-Leste (FONGTIL) hatudu katak, taxa vasina doze dahuluk menus, tanba governu rasik mak dezmotiva sidadaun hodi la partisipa iha vasina.
Diretor Exekutivu FONGTIL Daniel Santos do Carmo hatete, husi rezultadu monitorizasaun durante semana ida nia laran iha Munisipiu sia (9), Lautem, Aileu, Bobonaro, Ermera, Baukau, Viqueque, Manatuto, Manufahi no Liquisa, husi monitorizasaun nee FONGTIL deskobre partisipasaun komunidade ba simu vasina doze dahuluk menus.*
Reportajen: Alberto Menezes
Editor: Ekipa STL
