Governu Deklara Estadu Kalamidade Durante Loron 30

Ministru Prezidensia Konselu Ministru (MPKM) Fidelis Leite Magalhães. (Foto: MPKM)

DILI, STLNEWS.co – Konsellu Ministru aprova ona projetu rezolusaun governu ba deklarasaun estadu kalamidade, iha nivel nasional durante periodu loron 30, tanba ho akontesimentu bee sae no inundasaun iha Munusipiu Dili, iha loron 4 fulan Abril tinan 2021 neebe provoka husi siklone tropikal Seroja.

Tuir Ministru Prezidensia Konselu Ministru (MPKM) Fidelis Leite Magalhães katak, governu deside deklara estadu kalamidade durante 30 tanba ho situasaun dezastre naturais neebe akontese iha munisipiu Dili no munisipiu seluk tanba konsege hamate ema nain 42 no ema rihun 10 lakon sira nia hela fatin.

“Governu hahu ona kria grupu serbisu tekniku neebe sei responsavel ba identifikasaun infraestrutura no ekipamentu publiku koletivu neebe mak hetan estraga husi inundasaun no hodi prepara proposta sira ba nia rekonstrusaun ka rehabilitasaun,” dehan Fidelis ba jornalista sira, iha Palasiu Governu, Dili, Kinta (08/04/2021).

Governante nee hatutan, ho dezastre naturais neebe akontese iha Munisipiu Dili no fatin seluk, nunee Governu sei bandu komunidade sira neebe hakarak harii uma iha area inundasaun no area ho foho lolon neebe naton no too aas tanba perigu tebes. Tanba asaun ka forma utilizasaun rai neebe bele aumenta risku akontesimentu fila fali ka agrava ninia impaktu sira.

Iha biban nee mos Sekretariu Estadu Protesaun Sivil (SEPS), Joaquim Gusmão halo aprezentasaun ba Konsellu Ministru konaba pontu situasaun husi impaktu inundasaun neebe mak akontese iha 4 Abril tanba provoka husi siklone Seroja.

Tuir dadus neebe aprezenta husi SEPS ba KM relasiona ho dezastre naturais neebe akontese iha loron hirak liu ba konsege hamate ema nain 42 no rihun 10 mak lakon sira nia hela fatin.

Dezastre naturais nee hamate ema nain 22 husi Dili, 10 husi Ainaro, 5 husi Manatuto, 3 husi Viqueque, nomos nain 2 husi Aileu.*

Reportajen: Alberto Menezes
Editor: Ekipa STL

LEAVE A REPLY

Please enter your comment!
Please enter your name here