Governu Delibera Estende EE

Ministru Prezidensia Konselu Ministru (MPKM), Fidelis Leite Magalhães. (Foto: MPKM)

DILI, STLNEWS.co — Governu liu husi enkontru Konsellu Ministru delibera atu propoin ba Prezidente Republika, estende Estadu Emerjensia (EE) ba loron tolu nulu tan.

Tuir Ministru Prezidensia Konselu Ministru (MPKM), Fidelis Leite Magalhaes katak governu delibera ba Prezidente Republika (PR), Fransisco Guterres “Lu Olo” atu estende tan estadu emerjensia ba loron tolu (30) tan.

“Governu propoin ba Prezidente Republika katak, liu husi estensaun husi deklarasaun kona ba estadu emerjensia, permite atu suspende ka restrinje direitu sira kona ba sirkulasaun internasional, sirkulasaun no fiksasaun rezidénsia no rezisténsia,” dehan MPKM Fidelis Leite Magalhaes hafoin remata enkontru iha Palasiu Governu, Dili, Kuarta, (21/10/2020).

Nia hatutan haree ba evolusaun preokupante sira nian ba situasaun epidemiolojika no proliferasaun ba kazu rejistadu husi kontajiu COVID-19, iha nivel rejional, no mos nivel mundial, atu evita no neutraliza risku sira husi propagasaun SARS-CoV-2 nunee bele proteje saude publika no iha kbiit atu hatan ba Sistema Nasional Saude.

Fidelis hatutan, razaun governu husu Prezidente Republika estende estadu emerjensia nunee bele asegura reuniaun hirak neebe Konsellu Estadu No Konselu Defeza Seguransa bele halo ho tempu tanba estadu emrjensia neebe dadaun iha Fulan Outubru lao hela sei hotu iha loron 3 Novembru kalan 23: 59 oras Timor Leste.

“Ita hotu hatene katak iha semana oin iha atividade barak inklui mos loron matebian sei mai, tanba nee ho ida nee mak governu deside ona ohin atu husu Prezidente Republika Estende tan Estadu Emerjensia, para fo tempu ba orgaun soberania sira atu halo kalendariu nunee bele konvoka enkontru nesesariu para deside iha semana oin, nunee inisiu fulan oin bele hahu ona prosesu sira iha parlamentu no ikus deklara estadu emerjensia,” esplika Fidelis.*

Reportajen: Alberto Menezes
Editor: Ekipa STL

LEAVE A REPLY

Please enter your comment!
Please enter your name here