Governu Deside Implementa KO Ba Kapital Dili Durante Semana Ida; Bandu Atividade Aprendizajen No Relijioza

DILI, STLNEWS.co – Governu liu husi reuniaun Konsellu Ministru (KM) deside implementa hikas konfinamentu obrigatoriu ou konfinamentu domisiliariu jeral ba populasaun Munisipiu Dili durante loron hitu (7).

Konfinamnentu domisiliariu jeral ba populasaun Munisipiu Dili sei hahu entre tuku 00:00 OTL loron 27 fulan Agostu too tuku 23:59 OTL loron 2 Setembru.

Tuir Ministru Prezidensia Konsellu Ministru (MPKM), Fidelis Leite Magalhães katak, hafoin membru KM rona aprezentasaun husi Sala Situasaun Sentru Integradu Jestaun Krize (SIJK) konaba pontu situasaun epidemiologia iha teritoriu laran, liu liu variante Delta neebe hahu fo ameasa Timor Leste, mak KM deside Implementa hikas konfinamentu domisiliariu jeral ba populasaun Munisipiu Dili.

“Konsellu Ministru aprova ona rezolusaun governu nia hodi impoin hikas konfinamnentu domisiliariu jeral ba populasaun Munisipiu Dili durante semana ida, neebe sidadaun tenke hela iha sira nia uma ka iha sira nia alojamentu temporariu, no inklui sentru akollimentu, exetu iha situasaun neebe preve iha diploma nee, liuliu tanba razaun saude, serbisu, asesu ba sasan no servisu nesesidade bazika nian no simu vasina kontra COVID-19,” dehan Fidelis, hafoin remata Konsellu Ministru iha Palasiu Governu, Dili, Kuarta,(25/08/2021).

Porta voz governu afirma, ho konfinamnentu domisiliariu jeral ba populasaun Munisipiu Dili nee bandu atu transporte publiku liu liu mikrolete, taxi, bis kota, no anguna atu halo sirkulasaun.

“Bandu atu halo selebrasaun relijioza koletiva no bandu mos atu halao serimonia funebre neebe envolve partisipasaun ema nain sanulu liu, no estabelesimentu komersial, industrial, artezanal ka prestasaun servisu nian taka ba pabliku,” dehan Governante nee.

Fidelis fundamenta katak, atividade sira neebe governu autoriza atu lao nafatin tuir rezolusaun Governu mak hanesan estabelesimentu neebe faan aihan no sasan nesesidade bazika nian, eletrisidade, telekomunikasaun, prestasaun kuidadu mediku, farmasia, postu kombustivel nian, no instituisaun finanseira sira.

“Restaurante sira bele fornese hahan iha rejime take away ka entrega iha uma deit no estabelesimentu sira seluk neebe taka ba pabliku bele dezenvolve ninia atividade liu husi servisu entrega ba uma deit. Vendedor ambulante ba sasan alimentar no sasan ba nesesidade bazika bele mantein sira nia atividade. Merkadu sira munisipiu nian, hanesan merkadu Manleuana no Taibessi, mantein ninia funsionamentu, husi tuku neen (6) dader too tuku neen (6) loro-kraik,” tenik nia.

Porta voz governu nee husu nafatin ba populasaun sira atu uza maskara oin nian hodi taka inus no ibun, no mantein distansia, pelumenus metru ida ho ema seluk nunee bele evita propagasaun Covid-19.

Reportajen: Alberto Menezes
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Update Covid-19 TL 26 Setembru: Kazu Pozitivu 32 & Rekuperadu 83

DILI, STLNEWS.co - Sentru Integradu Jestaun Krize (SIJK) ohin relata kazu pozitivu iha ema nain 32 no rekuperadu hamutuk 117. "Kazu detetadu foun neebe relata ohin loron...

MTKI Loke Kompetisaun Pintura

DILI, STLNEWS.co - Ministeriu Turizmu Komersiu no Industria (MTKI), liu husi Diresaun Nasional Emprendismo ba Atividade Produtus Turistiku organiza kompetisaun pintura ba joven sira. Grupu...

Remata Nia Misaun Iha TL, Sitorus Despedida Ho WNI

DILI, STLNEWS.co – Embaixador Indonezia ba Timor Leste (TL), Sahat Sitorus ho nia espoza Bintang Vera C. Sitanggang, neebe durante tinan 4 ho balun...
%d bloggers like this: