Governu Estende Serka Sanitaria Ba Munisipiu Baucau-Viqueque Too 2 Abril

Konsellu Ministru halao sorumutuk estraordinariu liu husi video konferensia, aprova ona projetu rezolusaun governu nian ba renovasaun impozisaun serka sanitaria no konfinamentu domisiliariu jeral, ba populasaun iha munisipiu Baucau no Viqueque too tuku 23:59, loron 2 fulan Abril tinan 2021. (Foto: MPKM)

DILI, STLNEWS.co – Konsellu Ministru halao sorumutuk estraordinariu liu husi video konferensia, aprova ona projetu rezolusaun governu nian ba renovasaun impozisaun serka sanitaria no konfinamentu domisiliariu jeral, ba populasaun iha munisipiu Baucau no Viqueque too tuku 23:59, loron 2 fulan Abril tinan 2021.

Mantein nafatin regra sira hotu neebé antes nee defini ona iha rezolusaun Governu nu. 17/2021, 18/2021, 19/2021, no 20/2021 loron 15 fulan Marsu, neebe impoin serka sanitaria no konfinamentu domisiliáriu iha munisípiu Baucau no Viqueque.

Tuir Ministru Prezidensia Konselu Ministru (MPKM,) Fidelis Leite Magalhães katak, hafoin rona aprezentasaun husi Sentru Integradu Jestaun Krize (SIJK), membru Konsellu Ministru deside aprova rezolusaun governu nian, renovasaun ba impozisaun serka sanitaria no konfinamentu domisiliariu jeral ba populasaun iha munisipiu Baucau no Viqueuque too loron 2 Abril.

“Ho alterasaun governu nian konaba serka sanitaria ba munisipiu Baucau-Viqueque kontinua tama iha vigor to estadu emerjensia ba da-11 neebe sei hotu iha 2 Abril 2021, kontinua bandu sirkulasaun ema nian entre munisipiu rua nee ho sirkunskrisaun administrativa sira seluk, exetu iha kazu sira ho fundamentu forte tanba razaun seguransa publika, saude publika, asistensia umanitaria, manutensaun husi sistema abastesimentu buliku ka ba realizasaun interese publiku nian,” dehan MPKM Fidelis, iha palasiu Governu, Segunda,(29/03/2021).

Nia hatutan, permanese nafatin mos impozisaun no konfinamentu domisiliariu ba ema hotu neebe hela no daudaun nee iha munisipiu Baucau no Viqueuqe, exetu ba razaun neebe mak antes nee defini ona, liuliu ba razaun saude, servisu, no ba asesu ba sasan no servisu primeira nesesidade nian.

Konaba estensaun serka sanitaria ba munispiu Baucau-Viqueque hafoin 2 Abril, depende ba estensaun estadu emerjensia ba da-12, mak governu sei deside fali.

“Wainhira governu ba iha Parlamentu Nasional no hetan aprovasaun estadu emerjensia ba da-12 mak governu sei deside fila fali neebe iha planu enkontru membru KM neebe sei halo iha 1 Abril hodi bele foti desisaun konaba estende serka sanitaria ba nunisipiu rua nee ga lae” nia esplika.*

Reportajen: Alberto Menezes
Editor: Ekipa STL

LEAVE A REPLY

Please enter your comment!
Please enter your name here