Governu Estende SS Ba Dili Loron 14, Baucau – Viqueque Loron 7

Ministru Prezidensia Konsellu Ministrus, Fidelis Leite Magalhães. (Foto: Espesial)

DILI, STLNEWS.co – Konsellu Ministru aprova projetu rezolusaun governu konaba manutensaun impozisaun serka sanitaria no konfinamentu domisiliaru jeral ba populasaun sira iha Munisipiu Dili too oras 23:59 loron 17 fulan Abril no iha Munisipiu Baucau no Viqueque too oras 23:59 loron 10 fulan Abril 2021.

Tuir Ministru Prezidensia Konsellu Ministrus, Fidelis Leite Magalhães katak, membru KM deside hodi estende serka sanitaria ba Munisipiu Dili durante semana rua no Baucau-Viqueque semana Ida.

“Konsellu Ministru deside atu mantein imposizaun serka sanitaria no konfinamentu domisiliariu ba Munisipiu Dili durante loron sanulu resin hat (14),” dehan Fidelis hafoin remata enkontru Konsellu Ministru liu husi video konferensia, Kinta nee (01/04/2021).

Fidelis dehan, serka sanitaria no konfinamentu domisiliariu neebe implementa iha Munisipiu Dili bandu sidadaun sira atu sai husi uma, exeptu deit ba sira neebe atu aranja nesesidade uma laran mak bele sai hanesn hola hahan no medikamentu sira.

“Desizaun neebe governu hasai liu liu regras konaba SS no konfinamentu domisiliariu ba populasaun iha Munisipiu Dili nee, fo mos autorizasaun ba PNTL atu bele kontrola diak liu tan sidadaun sira nia movimentu iha hanesan bandu individu hirak neebe mak la kumpre regras, neebe estabelese ona para bele hakotu lalais transmisaun ba moras Covid-19 nee.” nia esplika.

Nunee kontinua bandu sirkulasaun ema entre munisipiu sira nee no iha munisipiu seluk, exeptu iha kazu sira neebe ho fundamentu forte tanba razaun seguransa publika, saude publika, asistensia umanitaria, manutensaun husi sistema abastesimentu publiku ka realizasaun interese publiku nian.

Nia mos dehan, iha reunian nee mos membru Konsellu Ministru deside hodi estende tan serka sanitaria ba munisipiu Baucau – Viquque durante semana ida.*

Reportajen: Alberto Menezes
Editora: Domingas Gomes

LEAVE A REPLY

Please enter your comment!
Please enter your name here