Governu Foun Kria Politika Diak, Ba Jestaun Bee Moos

DILI, STLNEWS.co – Sosiedade Sivil Luta Hamutuk husu ba IX Governu Konstitusionál neebe ukun husi Partidu CNRT atu halo politika diak, hodi rezolve problema bee moos neebe populasaun kontinua halerik.

Kestaun nee hatoo husi Diretor Ezekutivu Luta Hamutuk, Jose Alves da Costa ba STL iha Hotel Timor, Sabadu (24/06/2023).

Nia dehan, problema bee moos laos ona buat foun iha rai laran, liu-liu kapital Dili kontinua preokupa, tanba jestor sira laiha kbiit, laiha kapasidade, laiha planu diak, no oinsa atu kontrolu.

“Ita nia esperansa hotu katak, ho governasaun foun neebe mai bele rezolve problema bee moos, liu-liu uluk CNRT nia ukun mos problema ida nee boot liu, ema sei kuru bee iha jardin, neebe sira ba ukun fali nee hatene ona atu kontinua dezenvolve setor bee no saneamentu,” nia esplika.

Nia hatutan, sosiedade sivil husu ba IX Governu bele halo politika ida diak, haree estuda bazeia ba esperiensia neebe liu ona, nunee bele responde ba populasaun nia nesesidade loron-loron.

Diretor informa, maski durante nee governu iha politika diak, komunidade kontinua preokupa bee, tanba jestor sira laiha kbiit, laiha kapasidade, laiha planu diak, oinsa atu halo kontrolu ba bee moos.

“Durante ami nia observasaun haree iha fatin-fatin liu-liu Manleuana kada uma kain lori nia sanyo rasik ba fura bee husi sistema kanalizasaun bee moos, iha fatin sira selu, husi ida nee halo vizinhu sira haree malu la diak, tanba hadau malu bee nunee deit, balun hetan balun la hetan,” nia koalia.

Nia informa, iha situasaun nee akontese beibeik, maibe laiha intervensaun husi parte Bee Timor-Leste, Empreza Públika nian, oinsa atu halo jestaun diak, atu ema hotu-hotu iha neeba bele hetan bee moos ho kualidade no hetan bee ho kuantidade neebe hanesan,” nia deklara.

Nia tenik, iha parte balun mos kuaze komunidade barak enfrenta problema bee moos hanesan.

“Ita fo ezemplu konkretu iha Ailok Laran, ohin loron tekniku bee troka kanu, aban komunidade halo kuak, buat hirak nee hotu tanba laiha jestaun politika diak husi BTL, E.P, entau persiza hadia,” nia haktuir.

Nia esplika, kanalizasaun no fornesimentu bee moos ba uma hotu-hotu ho stavel, nee la persiza ba halo sosializasaun, ema hatene ona oinsa atu uza, maibe tanba bee moos sei limitadu entaun nesesidade obriga halo ema komprende mos finze la hatene, hodi dada naok bee.

Nia dehan, loloos nee importante mak kanaliza bee fornese duni ba ema hotu, regula ninia oras distribuisaun, atu ema hotu bele hatene katak, iha bairu ida nee sei asesu bee ho oras hanesan nee, nunee komunidade sira idak-idak bele prepara aan.

Diretor nee dehan, maski nunee tuir informasaun neebe sosiedade sivil asesu konforme husi BTL, E.P hasai iha tinan kotuk katak, iha ona planu atu dada bee husi Ermera mai Dili, maibe too ohin loron seidauk realiza.

“Foin lalais iha governu da ualu ninia mandatu, Bee Timor-Leste, Empreza Publika iha kompromisu atu halo imprestimu osan husi Ajensia ADB, atu finansia ba iha sistema kanalizasaun bee moos iha munisipiu sira, tamba nee ita hein deit ba oin nee,” nia sublina.

Iha fatin hanesan, Komunidade Suku Komoro, Maria Banca do Santos informa, Timor Leste ukun aan tinan 21, maibe komunidade kontinua halerik bee moos iha Kapital Dili, liu-liu Aldeia 4 Setembru, Suku Komoro, Postu Administrativu Dom Bosco, Munisipiu Dili.

“Ami hela iha Aldeia 4 Setembru sei kontinua halerik bee moos, tanba bee sai ho oras, ita seidauk kuru hotu bee maran ona,” nia informa.

Nia esplika, problema bee mos laos buat foun, maibe governu seidauk rezolve masimu ba problema bee moos, neebe komunidade sira presiza tebes ba nesisidade loron-loron, nunee governu foun tenki rezolve problema nee.

“Ita hanoin problema bee moos nee laos buat foun ba governu, maibe governu seidauk rezolve diak sistema bee, tanba ita iha kapital Dili deit bee susar ona, oinsa ho area rual,” nia deklara.

(jen)

LEAVE A REPLY

Please enter your comment!
Please enter your name here