Governu Foun Presiza Kumpri Promesa

DILI, STLNEWS.co – Governu foun presiza kumpri promesa neebe mak halo ona iha povu nia leet iha tempu kampanha, nunee fo moris diak ba povu.

Kestaun nee hatoo husi Padre Francisco Soares Fernandes ba STL via telefone, Sesta (02/06/2023).

Nia hatete, povu hili tanba ho programa neebe mak diak ba sira, tanba nee mak presiza kumpri promesa, nunee povu nia votus nee labele soe leet.

“Governu foun presiza kumpri promesa neebe halo, vizaun no misaun neebe koalia povu gosta hodi hili nee, entaun tenki kumpri ba ida nee para fo moris ba povu, se ida nee mak sira la realiza hanesan deit, tinan 5 mai koalia tan se mak rona, povu dehan tanba demokrasia nasaun nia kriteria mak hanesan nee, ami ba vota hili ami nia nain ulun ida, ita hein deit ona lalika mai kampanha, lalika mai koalia barak ona, tanba povu hatene ona nia direitu no dever, hein deit loron too mak ba vota se mak manan, duke ba bosok povu,” katak nia.

Nia hatutan, povu mos ohin loron matenek, sistema demokratika nee halo povu matenek ona no povu mos iha nia vizaun no povu mos forma familia oinsa halo jestaun ba nia familia ekonomia, moris.

Tanba nee, ukun nain sira ho kapasidade boot, ukun nasaun nee ukun didiak, buka fo resposta ba povu nia moris, labele haree koor, labele haree deit ita nia partidu, labele hanoin opozisaun deit.

Nunee mos Board Fundasaun Patria, Filomena Barros haktuir, governu foun lidera tanba konfiansa mai husi povu, no povu hili tanba programa neebe mak diak ba sira, tanba nee ukun presiza kumpri promesa hotu.

“Iha tempu kampanha, politiku nain sira tun ba kampanha hodi hatoo planu no programa ba povu, no sira haree planu no programa diak, tanba nee sira hili, tanba nee presiza kumpri promesa sira nee iha governasaun hodi hadia sira nia moris liu husi dada bee moos, eletrisidade no hadia Estrada ba sira nia hela fatin,” katak nia.

Iha sorin seluk, Diretor AJAR Jose Luis Oliveira hatutan, nia mos iha esperansa katak ho governu foun mai bele lori duni mudansa ba iha nasaun no povu ida nee.

(eme)

LEAVE A REPLY

Please enter your comment!
Please enter your name here