Governu Foun Tenki Tau Ema Kapasidade Iha Ministru

DILI, STLNEWS.co – Governu foun neebe mak lidera husi Partidu CNRT ho PD tenki delega ema neebe mak iha kapasidade ho vizaun politiku mak asumi kargu nudar ministru, nunee bele lori rai nee lao ba oin.

Kestaun nee hatoo husi Diretor HAK, Feliciano da Costa Araujo ba STL iha nia knaar fatin Farol Kuarta (31/05/2023) hatete, atu forma governu husi Partidu CNRT no PD liu husi sira nia koligasaun nee oinsa hatudu, didika sira nia aan ba iha intrese nasional, ida nee mak sosiedade sivil nia haree no hakarak.

“Husi internal partidu rua nee hatene ona oinsa eskolha ema neebe mak iha duni kapasidade no merese duni asumi kargu sira neebe mak husi partidu rua hodi lidera governu ida nee, sosiedade sivil sempre haree buat ida nee, tau ema neebe mak los iha fatin neebe mak los, se tau ema tanba deit konfiansa ba malu hodi tau iha neeba nia ba atu halo saida, nia mos justifika ba nia aan katak fatin neeba la serve ba hau tuur iha neeba, hau nia mak iha neeba, hanesan saudozu hatete labele uza nanal hodi justifika buat sira nee,” dehan Diretor HAK.

Diretor Hak hatutan, hein katak laos deit koligasaun partidu rua nee, maibe koalia nafatin inkluzaun sosial, involve ema hotu, signifika katak husi parte PD, no husi parte CNRT hodi hateke ba sira nia potensia neebe mak iha eskolha ba hodi tau hamutuk hodi servisu ba rai ida nee, ida nee mak importansia ba ukun nee.

“Laos ukun nee ita halo koligsaun, depois ita mak kaer ukun deit, depois ita kaer ukun nee haree took tinan 5 nee rejulta saida, povu hein mak ida nee, hanesan nasaun seluk ita sura loron 90 ou loron 100 halo saida, loron 100 ita plin plan ka halo saida ou buka tuir husi nee ba neebe, ida nee susar ba ita,” katak nia.

Iha sorin seluk, Diretor AJAR Jose Luis Oliveira hatutan, governu foun mai presiza governa, maski oras nee daudaun tribunal seidauk fo sai rezultadu, maibe provizoria CNRT mak iha vantajen boot atu lidera governasaun ida nee.

“Governasaun ida nee atu efetivu, klaru CNRT la hetan maioria absoluta iha PN, nia hakarak ka lakohi tenki bolu, buat neebe mak horiseik akontese, buat nee prosesu atu ba koligasaun, buat ida neebe mak ita dezeju nafatin mak bainhira hili ema neebe mak kaer pasta ministru sira nee tenki halo prosesu ida atu hili duni ema neebe mak iha kapasidade, tenki halo duni prosesu iha partidu rua nia laran, ema neebe mak nomea ba pelumenus nia tenki hatudu nia vizaun politika nee iha,” katak Diretor HAK.

Diretor Hak dehan, se mak kaer ministru tenki iha vizaun politika, no meritu nee kestaun politika, maibe vizaun politika mak importante, tanba nia atu lidera ministeriu tenki hatene klean atu lori ba neebe.

“Segundu nia tenki iha integridade koalia mos ho konsistente haraik aan, tenki hatudu ezemplu neebe mak diak, labele hanesan ministru halo sasan sabraut nee la merese kaer pasta nudar ministru, tanba ministru nee ita tenki kuidadu ita nia priviléjiu governasaun nee, nia mak governa nasaun nee oinsa ita hotu respeita fiar nia, entaun nia mos tenki hatudu intergridade diak, kestaun nia meritu ka la meritu ida nee relativu, tanba ita iha mos uza asesor atu suporta,” katak nia.

Nia hatutan, partidu tenki halo prosesu atu tais, nunee selesiona duni ema neebe mak ba tuur hodi kaer pasta ministru labele hili tun hili sae, no laiha prosesu ida iha partidu laran.

(eme)

LEAVE A REPLY

Please enter your comment!
Please enter your name here