DILI, STLNEWS.co – Esperansa setor privadu sira nian ba governu foun, aban bainrua tenki fo importansia ba dezenvolvimentu iha rai laran, liu-liu dezenvolve setor proditivu hanesan turizmu, agrikultura no peska, ho nunee bele kontribui reseita ba kofre estadu.
Kestaun nee fo sai husi Emprezariu Timor oan, Mateus da Costa ba STL liu husi telefone, Sabadu nee (22/04/2023).
“Sura deit ona loron ita atu hakat ba eleisaun parlamentar hodi forma governu foun, tanba nee husu partidu ida neebe deit mak kaer ukun tenki fo importansia ba setor sira neebe mak temi ona iha leten, tanba durante tinan barak nia laran ita ladun dezenvolve setor agrikultura peska, tanba nee produtu hotu ita depende ba rai liur, no setor turizmu ladun atrai turista sira mai, tanba kondisaun la diak,” sujere setor privadu nee.
Nia katak, lider sira labele promete deit programa sira nee iha kampana, maibe hafoin ba kaer ukuk tenki realiza, tanba setor hirak nee liga ba povu kiik sira nia moris no interese nasaun ida nee nian, tanba nee governu foun mai tenki halo modernizasaun ba setor produtivu iha rai laran, atu nunee bele mos lori moris diak ba povu no nasaun TL.
(mad)
