DILI, STLNEWS.co – Governu liu husi Sekertariu Estadu Asuntu Toponimia no Organizasaun Urbana (SETOU), Germano Santa Brites Dias ho Ekipa Guarda Munisipiu Dili hasai vendador sira neebe okupa estrada publiku, hodi halao atividade negosiu iha Tasi Tolu too Tibar.
Nia dehan, antes nee governu fo ona avizu ba negosiante sira neebe faan sasan iha trotoar leten no estrada publiku, karik la kumpri mak sei uza nia kbiit no forsa hodi muda no foti sira nia sasan hirak neebe sira faan lori ba lixeiru Tibar. Tanba govenru la tolera negosiante faan iha dalan publiku, tanba kria engarrafamentu iha dalan publiku.
“Ita avizu ona sidadaun hotu-hotu katak, iha kapital Dili hahu Tasi Tolu too Metinaro, no husi tasi ibun sira labele harii uma hodi faan sasan. Ami avizu too deit fulan Agostu, depois liu fulan nee mak ita sei uza kbiit foti sasan sira neebe faan iha dalan boot no iha tasi ibun, sei lori ba soe iha lixeiru Tibar,” hatete Germano Santa Brites Dias ba jornalista sira iha Tasi Tolu, Dili, Sesta (25/08/2023).
Nia tenik, vendedor barak mak utiliza espasu publiku sai fali fatin merkadu, presiza regula sira, nunee labele impede sidadun neebe lao ain.
Iha fatin hanesan, Vendedor Veronica Barros dehan, vendedor barak la satisfaz ho aktu husi asaun SETOU ho ekipa, tanba kalen sira sosa, jeleira, ai no seluk tan.
Governu hatene sobu, hatene lori fali negosiante sira nia sasan, tanba sira mos buka moris.
Nia koalia, uluk sira mos luta ba rai ida nee, tanba nee husu ba govenru no ekipa Guarda Autoridade Munisipiu Dili neebe mak sobu ona baraka ho sasan sira no jeleira sira monu hotu no aat ona, favor tula ba uma laos soe fali ba Tibar.
”Ami nudar povu kiik buka moris iha sidade Dili, tanba sobu ona ami nia sasan lori ba uma, laos ba soe iha tibar, ami laos lixu, uluk Indonezia halo ita atan agora Timor ukun aan mos ita sai vitima nafatin ba governu,” nia informa.
(jen)
