DILI, STLNEWS.co – Governu Japaun liu hosi nia Embaixada iha Timor Leste oferese bolsu estudu ba Timor-oan nain 12 neebe maioria funsaun publiku no ida mak laos funsaun publiku atu halao sira nia estudu mastradu no doutoramentu iha universsitariu sira neebe lokaliza iha Japaun. Bolseiru sira sei halao sira nia estudu iha area oi-oin durante tinan rua.
Embaixador Japaun ba Timor Leste, Kimura Tetsuya hato’o kestaun nee ba STL no RTTL hafoin halao serimonia despedida ho bolseiru sira iha Embaixada Japaun iha Dili, Kinta (10/8/2023).
Embaixador Kimura Tetsuya hatete, desde tinan 2018, Governu Japaun liuhosi programa Japan Development Scholarship (JDS) oferese bolsu estudu ba Timoroan hodi halao sira nia estudu iha area oin-oin iha universitariu sira neebe lokaliza iha Japaun.
Tuir nia, Timoroan nain 12 neebe agora dau-daun hetan bolsu estudu hosi Governu Japaun nee iha programa JDS ba dala lima nian.
“Ida nee programa JDS ba dala lima no Timoroan sira neebe hetan oportunidade iha programa JDS etapa dahuluk to’o etapa dahat gradua ona hamutuk ema nain atus ida resin,” dehan Embaixador Kimura Tetsuya.
Diplomata Japaun nee mos dehan katak programa nee sei kontinua nafatin ba oin, tanba liuhosi programa nee bele hasae kapasidade, abilidade no konhenesementu hodi bele halao dezenvolvimentu iha area neebe sira domina ho sira nia matenek bele lao diak liutan.
Embaixador Kimura Tetsuya mos hatete durante tinan 20 resin, Japaun apoiu ona prosesu rekonstrusaun nasaun Timor-Leste iha aspeitu oin-oin hanesan harí infraestrutura, diversifikasaun industria no expansaun ba servisu soial sira. Alein de nee, to’o ohin loron Timoroan barak mak partisipa ona treinamentu no kursu iha Japaun.
“Japaun ho Timor Leste iha istoria neebe naruk tebes no halao kooperasaun iha area oi-oin inklui dezenvolvimentu rekursu humanus. Espera katak liuhosi bolsu estudu neebe Governu Japaun oferese ba Timoroan sira, bele ajuda dezenvolvimentu institusional, liu-liu ba iha funsionariu publiku sira hodi hadia servisu sosiais sira no fo biban ba peskizador Timoroan sira aumenta sira nia kapasidade,” tenik Embaixador Tetsuya.
Embaixador Tetsuya esplika katak objetivu programa JDS nee atu apoiu dezenvolvimentu rekursu humanu ba funsionariu públiku, foin-sae sira iha Timor-Leste, ne’ebe hein katak sei halo formulasaun no implementasaun ba planu dezemvolvimentu sosial no ekonomia, ho esperansa atu sira bele sai mos lider iha futuru. Aleinde ne’e, projetu ne’e nia objetivu mak atu hametin liutan relasaun parsería entre Timor-Leste no Japaun.
Entretantu, Prezidente Funsaun Publiku, Dr. Faustino Cardoso Gomes husu ba bolseiru sira atu aproveita oportunidade ida nee ho diak hodi hametin sira nia konhesementu, abilidade, sira matenek no kapasidade atu aplika iha instituisaun sira neebe sira haknaar an ba bainhira sira remata sira nia estudu.
Prezidente Funsaun Publiku nee dehan katak nia rasik partisipa iha prosesu selesaun ba funsionariu sira atu hetan bolsu estudu neebe oferese hosi Governu Japaun. Alein de ekipa husi Institusaun Nasional Administrasaun Publika (INAP), reprezentante hosi JICA (Japan Internasional Coperation Agency (JICA) no sira hosi Embaixada Japaun iha Timor Leste partisipa iha prosesu selesaun nee.
“Ida nee programa Japaun nian neebe fo atensaun espesial ba funsionariu publika sira ho hanoin ida atu oinsa mak hasae kapasidade funsionariu publika sira, hasae sira niaabilitasaun lideraria no konhesementu e sira nia esperiensia iha rai liur nee bele ajuda diak liutan sira nia dezempenhu bainhira fila-fali mai iha ambitu servisu ba povu sira tuir ida-idak nia area,” dehan Faustino.
Tuir nia, funsionariu publiku sira neebe hetan bolsu estudu hosi Governu Timor Leste no nasaun amigu sira laos deit halao estudu iha Japaun, maibe iha nasaun seluk hanesan, Australia, Amerika no funsionariu publiku balun halao estudu iha Rusia.
Iha biban nee, bolseiru Timoroan hosi Oekusi, Laurensio Suni hatete nia agradese ba Governu Japaun no Timor Leste neebe halao koperasaun iha area rekusu humanus nian neebe fo oportunidade ba Timoroan halao estudu iha Japaun.
“Hau funsionariu publiku permanente iha Universidade Nasional Timor Leste (UNTL) hetan bolsu estudu hosi Governu Japaun atu halao estudu mastradu iha Universidade Hirosima-Japaun,” katak Laurensio Suni.
Tuir nia, bolsu estudu neebe Governu Japaun oferese ba Timoroan nain 12 nee ho objetivu atu hasae kapasidade hodi servisu diak liutan iha instituisaun neebe ida-idak haknaar an ba.
“Hau ho hau nia kolega nain 11 neebe hetan bolsu estudu hosi Governu Japaun halao ami nia estudu iha universitariu sira neebe lokaliza iha Japaun durante tinan rua. Matenek no eperiensia neebe ami hetan sei aplika iha instituisaun neebe ami haknaar ba. Ami laos hanesan bolseiru sira balun neebe hetan matenek mai fali iha Timor halai ba fatin seluk neebe iha osan boot,” hatete Laurensio Suni.
Partisipa iha serimonia despedida nee mak alein de Embaixador Japaun ba Timor Leste, Kimura Tetsuya, Prezidente Funsaun Publiku, Faustino Cardoso Gomes, partisipa mos reprezentante JICA iha Timor Leste, Mr. Mimpei Ito no diplomata sira iha Embaixada Japaun, inklui alumni bolseiru programa JDS nian.
(mik)
