DILI, STLNEWS.co – Liu husi Konselhu Ministru anula tiha impostu neebe hasae iha governasaun liu ba, lo-loos IX Governu tenki halo uluk estudu, se lae lori risku boot, tanba nasaun presiza osan.
“Uluk governu desidi hodi hasae impostu, laos mai automatika deit, maibe sira liu husi prosesu ida mak hodi aplika taxa, tanba ita nia nasaun presiza osan. Tan nee governu ida nee atu anula tenki halo uluk estudu. Los duni mudansa tenki iha, maibe tenki haree didiak, tanba nasaun presiza osan,” lia hirak nee fo sai husi Diretor Ezekutivu FONGTIL, Valetin da Costa Pinto ba jornalista iha Novu turizmu, Kinta nee (10/08/2023).
Nia afirma, lo-loos governu tenki halo uluk estudu iha merkadu, hafoin anula tiha taxa. Lo-loos governu hare uluk lai atendimentu ka taxa iha Portu Tibar nee tun ka sae, dala ruma sae makaas, tan nee sasan ilegal kontinua tama mai TL.
Tuir nia, governu iha kompetensia atu hatun oituan taxa, tanba haree ba kompra iha merkadu seidauk apar ho rendimentu neebe povu hetan, balun sei lao ho salariu kiik, la sufisiente atu sosa ai haan ruma iha tempu agora, maibe papel governu nian mak tenki halo uluk estudu ida iha baze, governu bele normaliza fali taxa, maibe haree mos ba ponte rendimentu, tanba durante tinan barak depende deit ba osan mina nian, laiha torneira seluk, karik la aplika taxa mak ba futuru nasaun sei hasoru problema boot.
Sosiedade Sivil nee sujere ba governu atu aplika taxa ba kareta, motor, se lae mak kareta aat iha ema nia nasaun sira sei lori mai sai lixu iha TL.
(mad)
