DILI, STLNEWS.co –Akademista Universidade Nasional Timor Lorosae (UNTL), Jose Lino da Costa hatete governu, laiha politika diak ba negosiante dalan publiku, tanba nee sira kontinua faan iha dalan ibun no trotoar leten.
“Maski governu kria ona lei Numeru 33/2008 hodi bandu negosiante sira labele uza fatin publiku hodi atividade negosiu, maibe realidade hatudu ita nia negosiante balun kontinua uza fatin publiku hodi halo atividade negosiu, buat hirak nee mosu tanba ita nia governu laiha politika diak hodi regula negosiante sira iha kapital Dili,” hatete Akademista UNTL, Jose Lino da Costa ba STL iha salaun BTL-E.P Dili, Kinta (07/09/2023).
Nia husu governu labele lori PNTL no Guarda Munisipiu Dili hodi duni negosiante sira ba mai iha Sidade laran, tanba governu rasik seidauk perepara fatin diak ba negosiante sira.
Iha fatin ketak, Xefi Suku Komoro Eurico da Costa esplika, ba maluk negosiante ambulantes neebe oras nee daudaun balun sei faan iha dalan ninin no balun kontinua faan iha trotoar leten, nee tanba falhansu mosu iha jestaun merkadu.
“Ita nian maluk sira nebe mak kontinua halo atividade negosiau iha fatin arbiru iha Suku Komoro tantu iha fatin seluk iha sidade laran nee, tanba falhansu nee husi jestaun merkadu neebe mak governu monta ladun diak, ho ida nee mak too ohin loron negosiante kontinua faan arbiru iha fatin sira iha sidade Dili,” nia tenik.
Nia esplika, governu kria ona sentru merkadu rua iha kapital Dili, hanesan merkadu Manleuan no merkadu Taibesi, tuir lo-loos governu halo politika diak liu-liu ba jestaun merkadu, hodi nunee bele regula negosiante sira bele halo atividade tuir fatin negosiu nia, laos hanesan agora fatin neebe mak governu bandu sira halo atividade negosiu hanesan iha trotoar no fatin seluk.
Iha sorin seluk, Deputada Olinda Guterres informa, maski governu estabelese ona sentru merkadu, maibe negosiante kontinua halo atividade negosiu la tuir fatin.
“Tanba nee, ita husu ba governu tenki kria fatin neebe dignu atu negosiante sira mos bele halao atividade negosiu hodi susenta familia uma laran,” nia afirma.
(jen)
