Governu Laiha Preparasaun Antisipa Dezastre Naturais

Deputadu husi Bankada CNRT, Gabriel Soares. (Foto: Espesial)

DILI, STLNEWS.co – Bankada CNRT espresa sira nia lamentasaun hasoru governu da-8, tanba laiha preparasaun neebe diak hodi antisipa dezastre naturais neebe akontese halakon povu sira nia vida.

Deputadu Bankada CNRT, Gabriel Soares dehan Bankada CNRT fo nia votus solidariedade no korajen ba vitima dezastre naturais, povu hein hotu hotu nia prezensa iha sira nia leet, hodi lolon liman ba malu atu hakmaan netik sofrementu neebe sira hasoru.

“Ami Bankada CNRT expresa lamentasaun boot hasoru Governu de Faktu neebe laiha preparasaun ruma, atu antesipa situasaun grave neebe bele mosu nuudar kauza husi natureza hodi evita vitima barak,” dehan nia liu husi deklarasaun politika Bankada CNRT, iha PN, Tersa (06/04/2021).

Nia dehan, Bankda CNRT hatoo sentidu kondolensia profundu ba maluk sira neebe lakon, membru familia durante inundasaun neebe akontese.

“Ita hotu konkorda katak, dezastre naturais nee situasaun ida neebe ita hotu la espera, familia rihun ba rihun lakon uma, riku-soin no aihan,” tenik nia.

Bankada CNRT haree katak, Governu de Faktu ida nee foku liuba kestaun Covid-19, ho aproximasaun dadus rai liur nian, no abandona tiha nia responsabilidade ba kestaun sira seluk, inklui posibilidade ba dezastre naturais neebe bele mosu hodi estraga ita nia rain no povu ida nee.

Iha loron 28 Marsu 2021, Diresaun Nasional Meteorolojia i Geofizika (DNMJ) alerta ona katak, sei mosu monsaun iha fin do Marsu no inisiu Abril, DNMJ prevene ona sei mosu fenomenu klimatiku ho volume udan been neebe boot sei akontese iha Timor-Leste.

Laos deit prevee kona ba volume udan been neebe boot, DNMJ mos alerta ona katak, sei iha posibilidade atu mosu risku hanesan bee sae, rai monu, no eletrisidade mate, iha area sira hanesan; Kosta Norte, Kosta Sul, no inklui RAEOA.

Maibe saida mak Governu de Faktu ida nee halo atu antesipa risku sira hanesan DNMJ fo sai ona nee, laiha liu planu no estratejia.

Iha fatin hanesan, Prezidente Bankada FRETILIN, Francisco Miranda Branco, dehan “Ami hatoo sentidas kondolensias ba familia sira neebe tutur metan iha sira nia ulun, tamba Timor Leste tomak hamutuk ho imi tutur mos metan iha ulun.

Nia dehan, Bankada FRETILIN presta nia solidariedade ba vitimas hotu neebe hetan husi dezastre natural neebe lori anin ho udan, halo nakonu kadalak no mota sira iha Timor-Leste laran tomak. Neebe tama no sobu ita nia uma, halo rai monu, halo tauk labarik kiik ho inan feto, ferik no katuas sira toba iha fatin bokon, halo ita nia kompatriotas temporariamente 27 neebe lakon sira nia vida, ita nia kompatriotas barak lakon sira nia uma ho sasan uma laran nian, lakon animal hakiak.

Too oras nee ita nia populasaun barak (karik bele rihun lima to rihun ualu) ita seidauk hatene loloos, tuir governu nia dadus rihun hat (4.000) mak sei konsentra iha fatin balu neebe governu prepara hela iha Dili laran.

Balun lakon sira nia uma, balun ladauk iha kondisaun atu fila hikas ba sira nia horik-fatin tanba sei moris iha trauma depois hetan dezastre boot ida nee. *

Reportajen: Domingas soares
Editor: Ekipa STL

LEAVE A REPLY

Please enter your comment!
Please enter your name here